اسلام آباد، 14 فروری(اے پی پی):وفاقی وزیر داخلہ محسن نقوی نے جشن بہاراں کے انتظامات کا جائزہ لیا۔
اسلام آباد کے شہری 25۔ 26 اور 27 فروری کو جشن بہاراں سے محظوظ ہو سکیں گے۔جشن بہاراں میں پاکستان بھر کے روایتی اور مشہور کھانوں کے سٹالز لگائے جائیں گے۔
جشن بہاراں میں رینجرز کا دستہ مشعل پریڈ اور اسلام آباد پولیس کا دستہ شمع پریڈ کا مظاہرہ کرے گا، پاک فوج کے بینڈز بھی پرفارم کریں گے اور آتش بازی کا زبردست مظاہرہ ہو گا۔
جشن بہاراں میں خٹک، کیلاش اور کتھک سمیت روایتی رقص کے شوز پیش کئے جائیں گے،رینجرز کی کیمل پلٹون اور نیزہ بازی کی ٹیمیں بھی مظاہرہ کریں گی۔
وزیر داخلہ محسن نقوی نے کہا کہ جشن بہاراں میں عوام کی تفریح کیلئے پہلی بار روایت سے ہٹ کر منفرد پروگرامز پیش کئے جائیں گے، جشن بہاراں کا مقصد پاکستان کی ثقافت اور کلچر کو اجاگر کرنا ہے،جشن بہاراں میں سفارتی برداری کو بھی مدعو کیا جائے گا تاکہ وہ ہماری ثقافت سے روشناس ہو سکیں اور اس موقع پر پاکستان میں غیر ملکی کمپنیوں کے سی ای آوز کو بھی شرکت کی دعوت دی جائے گی۔
وفاقی وزیر داخلہ نے پولیس لائنز میں جشن بہاراں کے لیے شمع پریڈ کی ریہرسل کا معائنہ کیا۔
وزیرداخلہ محسن نقوی کی زیر صدارت جشن بہاراں کی تیاریوں سے متعلق اجلاس ہوا۔وفاقی سیکرٹری داخلہ۔ چیف کمشنر اسلام آباد۔ آئی جی اسلام آبادپولیس۔ ڈپٹی کمشنر اسلام آباد اور متعلقہ حکام بھی اس موقع پر موجود تھے۔
