ملتان 19فروری (اے پی پی ): ایڈیشنل چیف سیکرٹری ساوتھ پنجاب فواد ہاشم ربانی نے سائنسی اور تکنیکی تعلیم کو ملک کی ترقی کے لئے ناگزیر قرار دیتے ہوئے کہا ہے کہ اعلیٰ تعلیمی معیار رکھنے والے ادارے ملک کی معاشی ترقی میں اہم کردار ادا کرتے ہیں جبکہ جدید سائنسی تعلیم سے آراستہ نوجوان ملک کے روشن مستقبل کی ضمانت ہیں۔
یہ بات انہوں نے ملتان یونیورسٹی آف سائنس اینڈ ٹیکنالوجی کے دورے کے موقع پر گفتگو کرتے ہوئے کہی۔ ایڈیشنل چیف سیکرٹری نے کہا کہ معیاری تعلیم کے ذریعے پاکستان کو ایک علمی معیشت میں تبدیل کیا جاسکتا ہے۔ان کا کہنا تھا کہ وقت کا تقاضا ہے کہ سائنسی ایجادات کے لئے تعلیمی اداروں میں ریسرچ اینڈ ڈویلپمنٹ کو فروغ دیا جائے اور کہا یونیورسٹیاں جدید علوم کو انڈسٹری کے ساتھ منسلک کرکےصنعتی ترقی میں کردار ادا کر سکتی ہیں جبکہ مستقبل میں مصنوعی ذہانت اور جدید ٹیکنالوجیز کا کردار بہت اہم ہوگا۔
ایڈیشنل چیف سیکرٹری نے جدید طرز کی اسٹیٹ آف دی آرٹ ملتان یونیورسٹی آفس سائنس اینڈ ٹیکنالوجی کے تعلیمی معیار کی تعریف کی اور کہا کہ ایسے ادارے قوموں کی ترقی میں اہم کردار ادا کرتے ہیں۔اس موقع پر ڈاکٹر محمد ارشد نے بریفنگ دیتے ہوئے بتایا کہ یونیورسٹی میں ڈیجیٹل آلات سے آراستہ 150 جدید طرز کے کلاس رومز قائم کئے گئے ہیں اور کمپیوٹر سائنس، فارمیسی،بزنس، نرسنگ، الائیڈ ہیلتھ، قانون اور دیگر فکیلٹیز میں تعلیم دی جارہی ہے۔
انہوں نے کہا کہ یونیورسٹی کی جدید طرز کی لائبریری میں 3لاکھ50 ہزار کتابیں آن لائن دستیاب ہیں جبکہ پنجاب کے علاوہ سندھ اور بلوچستان کے طلباء بھی یونیورسٹی میں زیر تعلیم ہیں۔ بریفنگ میں مزید بتایا گیس کہ انتظامیہ یونیورسٹی کو خطے کی سب سے جدید یونیورسٹی بنانے کے لئے پرعزم ہے۔
سابق وفاقی سیکرٹری محمد علی گردیزی اور ڈاکٹر محمد ارشد بھی ان کے ہمراہ تھے۔
