اسلام آباد،27فروری(اے پی پی): صدر آصف علی زرداری سے ابوظہبی کے ولی عہد شیخ خالد بن محمد بن زاید النہیان نے ایوانِ صدر میں ملاقات کی۔ اس موقع پر چیئرمین پاکستان پیپلز پارٹی بلاول بھٹو زرداری، خاتون اول آصفہ بھٹو زرداری، نائب وزیراعظم/وزیر خارجہ سینیٹر محمد اسحاق ڈار بھی موجود تھے ۔
ملاقات میں پاکستان اور متحدہ عرب امارات کا دوطرفہ تعلقات کومزید مضبوط بنانے کے عزم کا اعادہ کیا گیا، دونوں ممالک کا کاروبار، انفراسٹرکچر ، ثقافت اور عوامی روابط بڑھانے کی ضرورت پر زور دیا گیا۔
ملاقات میں صدر آصف علی زرداری نے کہا کہ پاکستان اور متحدہ عرب امارات کے درمیان تین نسلوں پر محیط دیرینہ عوامی اور ثقافتی تعلقات ہیں۔
صدر مملکت نے متحدہ عرب امارات کی قابل ذکر ترقی کو سراہا اور دوطرفہ تعلقات کی میراث کو آئندہ نسلوں تک منتقل کرنے ،دونوں ممالک کے مابین قریب تر اقتصادی اور تجارتی تعلقات فروغ دینے پر زور دیا اور پاکستان کے لیے متحدہ عرب امارات کی غیر متزلزل حمایت اور مختلف شعبوں میں تعاون کو سراہا۔
ملاقات میں شیخ خالد بن محمد بن زاید نے یو اے ای کا پاکستان کے ساتھ تعاون بڑھانے کے عزم کا اعادہ کیااور کہا کہ دورے کے دوران دستخط شدہ مفاہمت کی یادداشتیں دونوں ممالک کے درمیان اعتماد اور پائیدار تعلقات کی عکاس ہیں۔
