لاہور، 25 فروری ( اے پی پی ): گورنر پنجاب سردار سلیم حیدر خان سے پنجاب چیمبرسے تعلق رکھنے والے کاروباری حضرات کی سید علمدار حسین شاہ ، نیو یارک سمال چیمبر کی قیادت میں ملاقات کی ۔
گورنر پنجاب نے پنجاب کے مختلف چیمبرز کے کامیاب کاروباری شخصیات کو میڈلز اور شیلڈ ز سے نوازا اور کہا کہ اوورسیز پاکستانی بزنس مین ملک کا اثاثہ ہیں، ملکی معیشت کی ترقی اور استحکام میں ان کا کردار اہم ہے۔
انہوں نے کہا کہ چیمبرز سے منسلک کاروباری افراد نے نہ صرف ملک بلکہ بیرون ممالک میں بھی اپنی محنت اور لگن سے ملک کا نام روشن کیا ہے۔ ملک میں معاشی استحکام سے کاروباری سرگرمیاں بڑھ رہی ہیں۔ ملک میں سیاسی استحکام رہا تو انشاء اللہ اگلے چند سالوں میں ملک معاشی طور پر بہت بہتر ہو جائے گا۔
گورنر پنجاب نے کہا کہ ملک پر جب بھی مشکل وقت آیا تو اوورسیز پاکستانیوں اور پاکستانی بزنس مین نے ہمیشہ آگے بڑھ کر مدد کی ہے۔ اوورسیز پاکستانیوں کا پاکستان میں جان و مال کا تحفظ حکومت کی اولین ترجیح ہے۔ اوورسیز پاکستانی ترسیلات کے ذریعے ملک کی خدمت کررہے ہیں۔اوورسیز پاکستانیوں اور پاکستانی تاجر برادری کے لئے گورنر ہائوس کے دروازے کھلے ہیں۔
