نیویارک،19فروری(اے پی پی):نائب وزیراعظم اور وزیر خارجہ سینیٹر محمد اسحاق ڈار نے سعودی عرب کے نائب وزیر خارجہ انجینئر ولید عبدالکریم الخیریجی سے نیویارک میں ملاقات کی۔
نائب وزیراعظم نے پاکستان اور سعودی عرب کے دیرینہ تعلقات کو سراہتے ہوئے سعودی عرب کے ساتھ دوطرفہ اقتصادی اور سکیورٹی تعاون کو مزید مضبوط بنانے کے لئے پاکستان کے غیر متزلزل عزم کا اعادہ کیا۔
انہوں نے ولی عہد اور سعودی عرب کے وزیر اعظم شہزادہ محمد بن سلمان اور شاہ سلمان بن عبدالعزیز السعود کی دور اندیش قیادت میں سعودی عرب کی جانب سے کی جانے والی قابل ذکر پیش رفت کی تعریف کی اور علاقائی اور بین الاقوامی امن و سلامتی کے فروغ میں سعودی عرب کے اہم کردار کا ذکر کیا ۔
ملاقات کے دوران دونوں رہنمائوں نے دونوں ممالک کے درمیان گہرے سٹریٹجک اور اقتصادی تعلقات کو تسلیم کیا اور پاکستان میں سرمایہ کاری کے وسیع مواقع پر زور دیتے ہوئے اقتصادی تعاون کو وسعت دینے اور تجارت، سرمایہ کاری اور تجارتی شعبوں میں وسیع البنیاد تعاون کے مواقع تلاش کرنے کے عزم کا اعادہ کیا۔
دونوں رہنمائوں نے غزہ اور مغربی کنارے کی سنگین انسانی صورتحال سمیت مشرق وسطیٰ کی حالیہ پیش رفت پر بھی تبادلہ خیال کیا۔ انہوں نے غزہ جنگ بندی کے مکمل نفاذ، غزہ کے لوگوں کو مناسب اور بلا روک ٹوک انسانی امداد کی فراہمی اور تعمیر نو کے جلد آغاز اور دو ریاستی حل کی جانب پیش رفت پر زور دیا۔
انہوں نے مسلم امہ سے متعلق مسائل کے حل میں اسلامی تعاون تنظیم (او آئی سی) کے اہم کردار پر بھی زور دیا۔ ملاقات میں باہمی خوشحالی اور علاقائی استحکام کے لئے کثیر جہتی شراکت داری کو بڑھانے کے لئے پاکستان اور سعودی عرب کے مشترکہ عزم کا اعادہ کیا گیا۔
