تاشقند،26فروری(اے پی پی):پاکستان اور ازبکستان نے دفاع، ٹیکنالوجی، تکنیکی تربیت، میڈیا اور نوجوانوں کو بااختیار بنانے کے شعبوں میں دوطرفہ تعاون کو مضبوط بنانے کے لئے متعدد معاہدوں اور مفاہمت کی یادداشتوں پر دستخط کئے ہیں ۔ دونوں رہنماؤں کی دوطرفہ ملاقات اور وفود کی سطح پر ہونے والی بات چیت کے بعد وزیراعظم شہباز شریف اور صدر شوکت مرزایوف نے دستخط کی تقریب میں شرکت کی جبکہ دونوں اطراف کے حکام نے مختلف شعبوں میں تعاون کے معاہدوں اور مفاہمت کی یادداشتوں کی پہلے سے دستخط شدہ دستاویزات کا تبادلہ کیا۔
نائب وزیراعظم و وزیر خارجہ سینیٹر محمد اسحاق ڈار اور ازبک و زیر خارجہ بختیار سیدوف نے سفارتی پاسپورٹ رکھنے والوں کے لیے ویزہ فری سفر، ملٹری انٹیلی جنس، داخلی امور، پیشہ ورانہ اور تکنیکی تربیت اور سفارت کاروں کی تربیت کے شعبوں میں معاہدوں کی دستاویزات کا تبادلہ کیا۔ سائنسی تحقیق، ٹیکنالوجی اور اختراع کے شعبوں میں تعاون کے لیے دونوں فریقوں کے درمیان ایک اور بین الحکومتی معاہدے پر دستخط کیے گئے۔ وزیر تجارت جام کمال خان اور ازبک نائب وزیر اعظم خدجایف جمشید نے دستاویزات کا تبادلہ کیا۔
وزیر اطلاعات و نشریات عطاء اللہ تارڑ اور ازبکستان کی نیشنل انفارمیشن ایجنسی کے ڈائریکٹر جنرل کوچیموف عبدالسعید نے دونوں ممالک کے درمیان خبروں کے شعبہ میں تعاون کے لیے ایسوسی ایٹڈ پریس آف پاکستان (اے پی پی) اور ازبک اطلاعات ایجنسی (یو زیڈ اے) کے درمیان تعاون کے معاہدہ کی دستاویز کا تبادلہ کیا۔ نائب وزیراعظم اسحاق ڈار اور تاشقند کے میئر شوکت عمر زاکوف برانووچ نے لاہور اور تاشقند کے درمیان مفاہمت کی دستاویزات کا تبادلہ کیا جبکہ لاہور اور بخارا کے درمیان بطور جڑواں شہر تعلقات کے بارے میں مفاہمتی یادداشت پر بھی دستخط ہوئے۔
وزیراطلاعات و نشریات عطاء اللہ تارڑ اور ازبکستان کی یوتھ افیئر ایجنسی کے ڈائریکٹر سعد اللائیف علیشیر نے وزیراعظم یوتھ پروگرام اور ازبکستان کی حکومت کے درمیان نوجوانوں کے امور سے متعلق ایم او یو کی دستاویزات کا تبادلہ کیا۔ بعد ازاں وزیر اعظم شہباز شریف اور صدر نے وزیر اعظم کے دورے کے نتائج اور اعلیٰ سطحی سٹریٹجک تعاون کونسل کے قیام کے پروٹوکول سے متعلق مشترکہ اعلامیہ پر دستخط کئے۔
