اسلام آباد،13فروری(اے پی پی):وفاقی وزیر برائے منصوبہ بندی ترقی اور خصوصی اقدامات احسن اقبال کی زیر صدارت سیرت سنٹر لاہور منصوبے کی پیش رفت کا جائزہ لیا گیا۔
وفاقی وزیر برائے منصوبہ بندی احسن اقبال نے سیرت سنٹر لاہور کے آپریشنل اور گورننس پلان کے حوالے سے اجلاس کی صدارت کرتے ہوئے کہا کہ سرکاری شعبے کی یونیورسٹیوں میں سیرت چیئرز کے قیام کا مقصد ہماری آنے والی نسل میں نوجوانوں کو جدید دور کی تعلیم سے آراستہ کرنے کے ساتھ انھیں سیرت کی روشنی میں فکری و نظریاتی تعلیم سے بھی ہمکنار کرنا ہے۔
انھوں نے کہا کہ اس منصوبے کے تحت تین بڑے اجزاء شامل ہیں: پبلک سیکٹر یونیورسٹیوں میں سیرت چیئرز کا قیام، خواتین کے لیے صنفی مطالعہ اور حقوق کے لیے عالمی معیار کے مرکز کا آغاز، اور انڈومنٹ فنڈ کی تشکیل۔
اس اقدام کا مقصد نبی اکرم صلی اللہ علیہ وسلم کی زندگی سے اخذ کردہ نو موضوعات یعنی عقیدہ اور فرقہ وارانہ ہم آہنگی، قیادت اور حکمرانی، انسانی حقوق اور سماجی انصاف، کاروبار، تجارت اور جائیداد کے حقوق، تعلیم اور علم، پائیدار ترقی، سماجی بہبود، صنفی مطالعہ اور خواتین کے حقوق، اور عالمی امن کے شعبوں میں معیاری تحقیق کرنا ہے۔
وفاقی وزیر کا مزید کہنا تھا کہ خواتین سیرت سنٹر لاہور بنانے کا مقصد جنڈر اسٹڈیز میں سنٹر فار ایکسلینس قائم کرنا ہے تاکہ نوجوان نسل میں مذہب سے دوری کی لہر کا موثر علمی اور فکری سطح پر مقابلہ کیا جا سکے۔ اس سنٹر کا مقصد اپنی اقدار کو جدید دور کے تقاضوں کی روشنی میں خواتین کو یہ اعتماد دینا ہے کہ سیرت اور اسلامی تعلیمات انھیں باوقار اور کامیاب زندگی گزارنے کا راستہ سکھاتی ہیں۔
خواتین سیرت سنٹر میں طالبات اسلامی پس منظر کے ساتھ اقتصادیات، سوشالوجی، فلاسفی، پولیٹیکل سائنس، سائیکالوجی، کمپیوٹر، اور مینجمنٹ کی تعلیم بھی حاصل کریں گی۔ اس سنٹر میں پوسٹ گریجویٹ سطح پر جینڈر اسٹڈیز اور اسلام میں خواتین کے حقوق پر تحقیق کی جائے گی اور خواتین کو درپیش مسائل کے حل تجویز کیے جائیں گے۔
وفاقی وزیر نے اجلاس میں متعلقہ حکام کو ہدایت کی کہ سیرت سنٹرز کو جلد از جلد فعال کیا جائے، اساتذہ کی بھرتی اور لائبریری کے قیام کے عمل کو بھی فوری مکمل کیا جائے۔
