جدہ،8 فروری(اے پی پی):پاکستان اور سعودی عرب کے درمیان تجارتی حجم میں مزید اضافے کے امکانات روشن،فاسٹ فوڈ چین البیک نے پاکستان میں اپنی شاخیں کھولنے کی تصدیق کر دی، معاہدہ حتمی مراحل میں داخل ہو گیا ہے۔
وفاقی وزیر تجارت جام کمال خان نے جدہ میں اہم سعودی تاجروں سے ملاقات کی، جس دوران باہمی تجارتی تعلقات کو فروغ دینے پر تبادلہ خیال کیا گیا۔ملاقاتوں میں وزیر تجارت جام کمال نے مالی تعلقات کی مضبوطی پر روشنی ڈالی۔
سعودی سرمایہ کاروں نے پاکستان میں توانائی، زراعت، آئی ٹی اور تعمیراتی شعبے میں دلچسپی ظاہر کی ہے اورپاکستان اور سعودی عرب کے درمیان اقتصادی تعلقات کو مزید وسعت دینے پر اتفاق کیا گیا ہے۔
وزیر تجارت جام کمال خان نے البیک کے مالک رامی ابو غزالہ سے خصوصی ملاقات کی اور فاسٹ فوڈ چین کی پاکستان آمد پر تفصیلی گفتگو کی۔
اس موقع پر وزیر تجارت جام کمال خان نے کہا کہ
پاکستانی ورکرز سعودی معیشت میں کلیدی کردار ادا کر رہے ہیں، پاکستان کی نئی ویزا پالیسی کے تحت جی سی سی شہریوں کو ویزا فری انٹری اور 90 دن تک قیام کی سہولت دی گئی ہے۔ انہوں ںے کہا کہ البیک کی پاکستان آمد سے روزگار کے مواقع پیدا ہوں گے۔
