اسلام آباد۔26فروری (اے پی پی): چیئرمین سینیٹ سید یوسف رضا گیلانی سے بدھ کو عراق کے سفیر حامد عباس علی الارمشاوی نے پارلیمنٹ ہائوس میں ملاقات کی جس میں پاکستان اور عراق کے درمیان دوطرفہ تعلقات کے فروغ پر تبادلہ خیال کیا گیا۔ ملاقات میں تجارتی، اقتصادی، پارلیمانی، مذہبی و ثقافتی روابط پر گفتگو کی گئی۔
اس موقع پر گفتگو کرتے ہوئے چیئرمین سینیٹ نے کہا کہ پاکستان اور عراق تاریخی، ثقافتی اور مذہبی رشتوں میں بندھے ہوئے ہیں۔انہوں نے کہا کہ دونوں ممالک کے درمیان تعاون کو مزید وسعت دینے کی ضرورت ہے۔ انسانی وسائل، تجارت، آئی ٹی، ٹیکسٹائل اور توانائی کے شعبوں میں تعاون بڑھانے کی ضرورت ہے۔ ملاقات میں پارلیمانی سفارتکاری اور وفود کے تبادلوں میں فروغ پر اتفاق کیا گیا۔
سید یوسف رضا گیلانی نے زراعت، تجارت، پانی، توانائی، تعلیم، سیاحت اور دفاع میں تعاون بڑھانے پر زور دیتے ہوئے کہا کہ پاکستانی زائرین کے انتظامات کو مزید منظم کرنے کی اشد ضرورت ہے ۔پاکستان اور عراق کے درمیان براہ راست فضائی رابطوں سے عوامی روابط مستحکم ہوں گے۔ہر سال اڑھائی لاکھ پاکستانی زائرین مقدس مقامات پر حاضری کے لیے عراق جاتے ہیں۔
چیئرمین سینیٹ نے عراقی سفیر کو ملتان کے دورے اور سرمایہ کاروں سے ملاقات کی دعوت دی اور کہا کہ دوطرفہ تعاون کے فروغ کے لیے پارلیمانی فرینڈشپ گروپ کا کردار انتہائی اہم ہے۔افرادی قوت اور دیگر شعبوں میں ایم او یوز پر عملدرآمد کی ضرورت ہے۔سید یوسف رضا گیلانی نے کہا کہ زراعت، دفاع اور تجارت میں تعاون دونوں ممالک کو قریب لائے گا۔
عراق کے سفیر نے دوطرفہ تعلقات مزید مضبوط کرنے کے عزم کا اظہار کیا اور کہا کہ عراقی ایوان نمائندگان کے سربراہ کی جانب سے چیئرمین سینیٹ کو دورہ عراق کی دعوت دی۔ عراق پاکستان کے ساتھ تجارتی، اقتصادی اور ثقافتی تعلقات مستحکم کرنے کے لیے پرعزم ہیں ۔
