پشاور ،21 فروری(اے پی پی): چیئرپرسن بینظیر انکم سپورٹ پروگرام (بی آئی ایس پی) سینیٹر روبینہ خالد نے گورنر خیبرپختونخوا فیصل کریم کنڈی سے گورنر ہاؤس میں ملاقات کی، جس میں مستحق افراد کی فلاح و بہبود کے لیے مختلف سماجی تحفظ اقدامات، پروگرام کے دائرہ کار میں وسعت، ماڈل دفاتر کے قیام اور اراضی کے حصول جیسے اہم امور پر تبادلہ خیال کیا گیا۔
ملاقات کے دوران سینیٹر روبینہ خالد نے گورنر خیبرپختونخوا کو بی آئی ایس پی کے جاری پروگراموں پر بریفنگ دی۔ انہوں نے بتایا کہ بی آئی ایس پی ملک کے پسماندہ طبقات، بالخصوص خواتین کی معاشی خودمختاری کے لیے کلیدی کردار ادا کر رہا ہے۔ بینظیر کفالت پروگرام کے تحت مستحق خواتین کو سہ ماہی بنیادوں پر مالی امداد دی جاتی ہے، جبکہ بینظیر تعلیمی وظائف بچوں کی تعلیم کے فروغ میں معاون ثابت ہو رہے ہیں۔ اس کے علاوہ، بینظیر نشوونما پروگرام کے ذریعے ماں اور بچے کی صحت و غذائیت کے لیے خصوصی اقدامات کیے جا رہے ہیں۔
گورنر خیبرپختونخوا فیصل کریم کنڈی نے بی آئی ایس پی کے کردار کو سراہتے ہوئے کہا کہ یہ پروگرام ملک میں تخفیف غربت اور سماجی بہبود میں نمایاں حیثیت رکھتا ہے۔
انہوں نے کہا کہ بینظیر انکم سپورٹ پروگرام، شہید محترمہ بینظیر بھٹو کے وژن کا تسلسل ہے، اور اس کی وسعت اور شفافیت کو مزید بہتر بنانے کے لیے تمام ممکنہ اقدامات کیے جا رہے ہیں تاکہ زیادہ سے زیادہ مستحق افراد مستفید ہو سکیں۔
ملاقات میں پشاور میں بی آئی ایس پی کے ماڈل دفتر کے قیام کے لیے اراضی کے حصول پر بھی تبادلہ خیال کیا گیا۔ گورنر خیبرپختونخوا نے چیئرپرسن بی آئی ایس پی کو اپنے مکمل تعاون کی یقین دہانی کرائی اور کہا کہ ملک بھر میں بی آئی ایس پی کے ماڈل دفاتر قائم کیے جائیں گے تاکہ عوام کو بہترین سہولیات فراہم کی جا سکیں۔
