لاہور، 12 مارچ(اے پی پی): سیکرٹری داخلہ پنجاب نور الامین مینگل سے امریکی قونصل جنرل کرسٹن ہاکنز نے ملاقات کی۔ملاقات میں پنجاب میں امن و امان کی صورتحال اور سکیورٹی اداروں کی پیشہ ورانہ صلاحیت بارے تبادلہ خیال کیا۔
امریکی قونصل جنرل نے چیمپئنز ٹرافی کے پرامن انعقاد پر مبارکباد دی اور کہا کہ قانون نافذ کرنے والے اداروں کی بدولت پنجاب میں خود کو محفوظ تصور کرتے ہیں۔
سیکرٹری داخلہ پنجاب نے کہا کہ ٹیکنالوجی کی مدد سے پنجاب بھر کو محفوظ بنا رہے ہیں، نور الامین مینگل نے کہا کہ دہشت گردوں کے خلاف زیرو ٹالرینس پالیسی پر عمل پیرا ہیں، گزشتہ ایک سال میں 150 سال پرانے قوانین کو جدید تقاضوں کے مطابق اپڈیٹ کیا اور قانون نافذ کرنے والے اداروں کو ماڈرن آلات فراہم یئے ہیں ۔
سیکرٹری داخلہ پنجاب نے کہا کہ جدید تقاضوں کے مطابق کرائم کنٹرول ڈیپارٹمنٹ جیسے ادارے بنا رہے ہیں اور بین الصوبائی بارڈر سکیورٹی کیلئے 14 جدید چیک پوسٹس بھی بنا رہے ہیں، نور الامین مینگل نے بتایا کہ جیل ریفارمز پر بہت محنت ہوئی اور اسیران کی بحالی کیلئے اقدامات اٹھا رہے ہیں۔
امریکی قونصل جنرل نے جعفر ایکسپریس کے واقعے پر افسوس کا اظہار کیا۔سیکرٹری داخلہ پنجاب نے کہا کہ جعفر ایکسپریس کے افسوسناک واقعے کے حوالے سے بلوچستان حکومت سے مسلسل رابطے میں ہیں، انھوں نے کہا کہ ملک دشمن عناصر کے ناپاک عزائم خاک میں ملا کر رہیں گےسپیشل سیکرٹری داخلہ فضل الرحمن، ایڈیشنل سیکرٹری پریزن عاصم رضا، ایڈیشنل سیکرٹری انٹرنل سکیورٹی احسان جمالی نے اجلاس میں شرکت کی۔
