اسلام آباد، 10 مارچ (اے پی پی): وفاقی وزیر مذہبی امور سردار محمد یوسف خان نے کہاہے کہ قرآن و حدیث کی روشنی میں بطور مسلمان ہمیں اپنی ذمہ داریوں کا ادراک کرتے ہوئے اپنی غیرمسلم آبادی کی مذہبی اور شخصی آزادی کے سلسلے میں اپنا کردار ادا کرناہوگا۔
پیرکو انہوں نے بطور وزیر مذہبی امور وزارت کاقلمدان سنبھالا۔ اس موقع پر وزارت مذہبی امور کی جانب سے حج انتظامات ، وزارت کے ذیلی اداروں اوردیگر امور پر انہیں تفصیلی بریفنگ دی گئی۔
اس موقع پر انہوں نے کہا کہ دنیا کا سب سے بڑا قانون قرآن وحدیث ہے، ہم مسلمان ہیں اس لئے ہمیں اپنی ذمہ داریوں کو سمجھنا ہوگا۔ انہوں نے اس با ت پر زور دیا کہ حج 2025 کے موقع پرعازمین کی تربیت میں کوئی کمی نہ چھوڑی جائے تاکہ پاکستانی عازمین حجاز مقدس میں قیام کے دوران سعودی قوانین کے مطابق رہ سکیں بلکہ مناسک حج کی ادائیگی میں بھی انہیں کسی دشواری کا سامنا نہ کرنا پڑے۔
