اسلام آباد، 26 مارچ (اے پی پی):آئی جی موٹروے پولیس رفعت مختار راجہ نے ریجنل آفس اسلام آباد میں ٹرانسپورٹرز سے ملاقات کی اور رمضان المبارک کے آخری ایام میں ٹرانسپورٹرز سے مسافروں کے ساتھ تعاون پر زور دیا گیا۔
آئی جی نے واضح کیا کہ اوور لوڈنگ اور زائد کرایہ وصول کرنا ہرگز قابل قبول نہیں ہے۔
آئی جی رفعت مختار راجہ نے کہا کہ موٹروے پولیس مسافروں کے محفوظ سفر کے لیے ہر ممکن اقدامات اٹھا رہی ہے۔ انہوں نے بتایا کہ آر ایف آئی ڈی نظام کے تحت پبلک سروس سپیڈ کنٹرول مانٹیرنگ نظام تیار کیا جائے گا۔ آئی جی موٹروے پولیس نے مزید کہا کہ کلر کہار سالٹ رینج میں خود کار نظام کے تحت گاڑیوں کی سپیڈ کی مانیٹرنگ شروع ہوگئی ہے۔
آئی جی نے زور دیا کہ موٹروے پولیس ٹرانسپورٹرز کے ساتھ مل کر مسافروں کی سلامتی کو یقینی بنا رہی ہے۔ انہوں نے یقین دہانی کرائی کہ ٹرانسپورٹرز کے مسائل کے حل کے لیے موٹروے پولیس بھرپور تعاون کرے گی۔
