لاہور، 06مارچ (اے پی پی): صوبائی وزیر لائیو سٹاک و زراعت سید عاشق حسین کرمانی کی زیر صدارت لائیو سٹاک ڈیپارٹمنٹ میں اہم اجلاس منعقد ہوا جس میں وزیر اعلیٰ پنجاب لائیو سٹاک کارڈ ،جنوبی پنجاب کی دیہی بیوہ و مطلقہ خواتین میں لائیو سٹاک اثاثہ جات کی تقسیم اور دوسرے منصوبوں پر پیش رفت کا جائزہ لیا گیا۔
اجلاس میں جانوروں میں منہ کھر بیماری کو کنٹرول کرنے کے لیے محکمانہ حکمت عملی و اقدامات پر بھی غور کیا گیا۔ صوبائی وزیر لائیو سٹاک و زراعت نے گفتگو کرتے ہوئے کہا کہ وزیر اعلیٰ مریم نواز شریف کی قیادت میں پنجاب حکومت نے لائیو سٹاک سیکٹر کی ترقی کے لیے متعدد منصوبوں کا آغاز کیا ہے۔ منصوبوں کے مثبت نتائج سامنے آنا شروع ہو گئے ہیں۔
صوبائی وزیر نے بتایا کہ اب تک 13ہزار 451کارڈ کسانوں نے وصول کر لیے ہیں۔انھوں نے کہا کہ اب تک 10ہزار 990کسانوں کے 77ہزار 627 نر بچھڑے/کٹٹرے کو ٹیگیڈ کیا گیا ہے۔
سید عاشق حسین کرمانی نے کہا کہ لائیو سٹاک کارڈز کی فارمرز کو بروقت ڈلیوری کے حوالے سے کسی قسم کی کوتاہی برداشت نہیں کی جائے گی۔
صوبائی وزیر نے تمام ڈویژنز میں تعینات ڈائریکٹرز کو روزانہ کی بنیاد پر بذات خود لائیو سٹاک کارڈ ڈلیوری سنٹرز کے دورے کرنے کے احکامات جاری کئے۔
سید عاشق حسین کرمانی نے کہا کہ ایسے فارمرز جن کے کارڈز سنٹرز پر پہنچ گئے ہیں اور وہ کارڈ وصولی کے لیے نہیں ارہے ہیں۔ان سے رابطہ کیا جائے۔
انھوں نے کہا کہ لائیو سٹاک ڈیپارٹمنٹ مویشی پال فارمرز کو لائیو سٹاک کارڈ کے آنے والے تمام مراحل ٹیگنگ،ویکسینشن اور ان سیمنیشن کے بارے میں آگاہ کرنے گا ۔
صوبائی وزیر نے ہدایت دی کہ مویشی پال کسانوں کو اس حوالے سے کسی قسم کی دشواری پیش نہیں آنی چاہیے ۔ وزیر لائیو سٹاک نے کہا کہ جنوبی پنجاب کے 12اضلاع کی 55 سال تک عمر کی دیہی خواتین کو دو سالوں میں تقریبا 11ہزار جانور (جھوٹیاں/ویہٹریاں) تقسیم کیے جائیں گی۔ پنجاب کے 5اضلاع بہاولنگر، ملتان، خانیوال، لودھراں اور راجن پور میں اب تک 2041 انیملیز بیوہ و مطلقہ خواتین میں تقسیم کئے جا چکے ہیں۔ ان کو بنک آف پنجاب کی جانب سے کارڈ بھی ڈلیور ہو گئے ہیں۔
وزیر لائیو سٹاک نے ہدایت دی کہ جانوروں میں منہ کھر بیماری کو کنٹرول کرنے کے لیے جلد حکمت عملی وضع کی جائے۔ منہ کھر بیماری کے نقصانات کو کم کرنے کے لیے ویکسین کی پیداواری صلاحیت کو مزید بہتر بنایا جائے۔
وزیر لائیو سٹاک و زراعت نے کہا کہ ہم سب ایک ٹیم کا حصہ ہیں۔ وزیر لائیو سٹاک نے ڈویژنل ڈائریکٹرز کو فیمیل انیلیمیز کی غیر قانونی قربانی روکنے،جانوروں کی ریگولر رپورٹنگ اور محکمہ کی زمینوں پر غیر قانونی قبضہ و تجاوزات واگزار کرانے کے لیے اپنا موثر کردار ادا کرنے کے احکامات جاری کئے۔
انھوں نے کہا کہ ناقص کارکردگی کا مظاہرہ کرنے والوں آفیسران کی محکمہ میں کوئی جگہ نہیں ہے اور ان کے خلاف ایکشن ہو گا۔
اجلاس میں سپیشل سیکرٹری لائیو سٹاک جنوبی پنجاب اصفر، ایڈیشنل سیکرٹری لائیو سٹاک عثمان طاہر، ڈائریکٹر جنرلز توسیع، پروڈکشن،ریسرچ(لائیو سٹاک)،بینک آف پنجاب ،پی آئی ٹی بی اوراربن یونٹ کے نمائندگان نے بھی شرکت کی۔
