اسلام آباد، 23 مارچ (ٓے پی پی): وزیراعظم محمد شہباز شریف نے کہا ہے کہ قابل تجدید توانائی کا فروغ حکومت کی ترجیح ہے۔ پاور سیکٹر میں اصلاحات کی بدولت عوام کو بجلی کی قیمتوں میں مزید ریلیف فراہم کریں گے ۔
پاور ڈویژن کے امور کے جائزہ اجلاس کی صدارت کرتے ہوئے وزیر اعظم نے متعلقہ حکام کو سولرآئزیشن پالیسی کے حوالے سے عوام میں پائے جانے والے تمام ابہام کو حقائق اور اعدادوشمار کی بنیاد پر دور کرنے کی ہدایت کرتے ہوئے کہا کہ شمسی توانائی کے حوالے سے حکومت کی پالیسی اور ترجیحات میں کوئی تبدیلی نہیں آئی ۔
وزیر اعظم نے کہا کہ جنریشن کمپنیوں کے خاتمے کے حوالے سے تمام تر قانونی اور دیگر امور جلد از جلد طے کئے جائیں ۔وزیراعظم نے بجلی کی تقسیم کار کمپنیوں کی نجکاری کا عمل تیز تر کرنے کی ہدایت کرتے ہوئے کہا کہ بجلی کے نرخوں میں کمی کے حوالے سے ایک جامع اور مؤثر حکمت عملی کے تحت پیکج تیار کیا جا رہا ہے جس کا اعلان جلد کر دیا جائے گا ۔ وزیر اعظم نے توانائی کے شعبے کے حوالے سے جامع حکمت عملی مرتب کرنے کے لئے پاور ڈویژن ، آبی وسائل ڈویژن اور پیٹرولیم ڈویژن میں ہم آہنگی کو مزید بہتر بنانے کی بھی ہدایت کی۔
