قصور،28مارچ(اے پی پی): قصور پولیس کا احسن اقدام،بازاروں میں خواتین کے تحفظ کے لئے ویمن پولیس سکواڈ قائم کر دیا گیئا ہے جس کا شہر میں گشت جاری ہے۔بازاروں میں رش کے اوقات میں خواتین اوربچوں کے تحفظ کیلئے خصوصی “ویمن پولیس سکواڈ” گشت کر رہا ہے ، جس میں 15 ویمن پولیس سکواڈ کی ٹیم سائیکل پر جبکہ 20 پیدل بازاروں اورمارکیٹوں میں گشت کر رہی ہیں۔
ڈی پی او قصور محمد عیسیٰ خاں نے بتایاکہ ویمن پولیس سکواڈ کا مقصد بازاروں اورمارکیٹوں میں شاپنگ کیلئے آنے والی خواتین کو تحفظ فراہم کرنا ہے، بازاروں میں عید کے رش کے باعث خواتین سے چھینا جھپٹی کے واقعات میں واضح کمی ہو گی، ویمن سکواڈ کے ساتھ ساتھ ایگل سکواڈ اور تھانوں کی پٹرولنگ گاڑیاں بھی موجود ہیں جبکہ شہر کے اہم مقامات، چوکوں اور داخلی و خارجی راستوں پر پولیس اہلکاروں کی سنیپ چیکنگ بھی جاری ہے،بازاروں اور گلیوں میں خواتین کا تحفظ ہر صورت یقینی بنایا جائے گا۔
ڈی پی اوقصورنے کہا کہ خواتین بلا خوف عید کی شاپنگ کریں، قصور پولیس آپ کے تحفظ کیلئے موجود ہے،خواتین کے تحفظ کیلئے باقاعدہ ویمن پولیس سکواڈ کا قیام وزیراعلیٰ مریم نوازشریف کا مستحسن اقدام ہے۔
