لاہور، 6 مارچ (اے پی پی): وزیر اعلیٰ پنجاب مریم نواز میؤ اسپتال پہنچیں تو مریضوں نے شکایات کے انبار لگا دیے۔ اس موقع پر مریم نواز نے میؤ اسپتال کی انتظامیہ کی سخت سرزنش کی اور ایم ایس کو عہدے سے فوری ہٹانے کا حکم دے دیا۔
وزیرِ اعلیٰ پنجاب مریم نواز نے کہا کہ لوگ اسپتال میں علاج کی توقع اور امید لے کر آتے ہیں، کس وارڈ میں کیا ہو رہا ہے، اسپتال انتظامیہ کو علم ہی نہیں۔
مریم نواز نے کہا کہ جو عوام کے ساتھ ہو رہا ہے ذمے داروں کے اپنوں کے ساتھ ہو تو پتہ چلے۔ میؤ اسپتال میں زیرِ علاج مریضوں اور لواحقین نے سرنج اور برنولا وغیرہ تک نہ ملنےکا وزیرِ اعلیٰ کو بتایا۔
مریم نواز نے انتظارِ گاہ اور راستے میں کھڑے مریضوں اور لواحقین کی شکایات سنیں اور میؤ اسپتال میں ہی ہنگامی اجلاس کی صدارت بھی کی۔ انہوں نے دواؤں کے واجبات کی ادائیگی کے لیے فوری اقدامات کا حکم دیا اور میؤ اسپتال میں ادویات کی 100 فیصد فراہمی یقینی بنانے کی ہدایت کی۔
وزیراعلیٰ مریم نواز شریف نے سیکرٹری ہیلتھ کو ذمہ داروں کی تعین کرکے کارروائی کی ہدایت دی اور میو ہسپتال کی تعمیر و مرمت کا جامع پلان طلب کر لیا۔
وزیراعلیٰ مریم نواز شریف نے میو ہسپتال ایمرجنسی بلاک،ٹی بی اینڈ چیسٹ، آئی سی یو کارڈیالوجی اور دیگر وارڈ کا جائزہ بھی لیا اور وارڈز میں زیر علاج مریضوں کی عیادت کی، جلد صحت یابی کی دعا کی۔ وزیراعلیٰ مریم نوازشریف نے ہسپتال کے مختلف وارڈزمیں صفائی کی صورتحال کا بھی جائزہ لیا۔
