اسلام آباد،3مارچ(اے پی پی): پاکستان میں تعینات برطانوی ہائی کمشنر جین میریٹ نے وزیراعظم محمد شہباز شریف سے ملاقات کی۔ وزیر اعظم نے شاہ چارلس سوم کے لئے نیک خواہشات کا اظہار کیا اور ان کی مکمل صحتیابی کی خواہش کی۔
انہوں نے شاہ چارلس سوم کو پاکستان کا دورے کی دعوت کا اعادہ کیا۔ وزیراعظم نے دونوں ممالک کے درمیان دوطرفہ تعلقات میں ہونے والی پیش رفت پر بھی اطمینان کا اظہار کیا۔
عالمی صورتحال پر تبادلہء خیال کرتے ہوئے وزیراعظم نے غزہ اور یوکرین میں دیرپا امن کے قیام کے لیے اجتماعی کوششوں کی ضرورت پر زور دیا۔
ملاقات میں برطانوی ہائی کمشنر نے کہا کہ ان کا ملک پاکستان کے ساتھ اپنے تعلقات کو مضبوط بنانے کے لیے پرعزم ہے۔
