اسلام آباد،14مارچ(اے پی پی):وزیرِ اعظم محمد شہباز شریف سے پاکستان کی معروف کاروباری شخصیات کے وفد نے ملاقات کی، ملاقات میں وفد نے سرمایہ کاری اور بر آمدات میں اضافے پر حکومت کی ہر قسم کی معاونت کی یقین دہانی کرائی، کاروباری شخصیات کی جانب سے وزیرِ اعظم کی معاشی ٹیم کی کاوشوں کی تعریف بھی کی گئی۔
اس موقع پر وزیر اعظم شہباز شریف نے کہاکہ پاکستان میں پائیدار معاشی ترقی کیلئے سرمایہ کاری لائیں، حکومت آپکی ہر قسم کی معاونت کرے گی. پاکستان میں طویل مدتی سرمایہ کاری کا مربوط اسکیم لایا جائے، برآمدکنندگان کی سہولت کیلئے ایکسپورٹ فیسیلیٹیشن اسکیم کے حوالے سے کمیٹی قائم ہو چکی، جلد اپنی تجاویز کا مسودہ منظوری کیلئے پیش کرے گی۔
وزیرِ اعظم نے کہاکہ ملکی معیشت کی ترقی کیلئے سب کو ایک ساتھ مل کر کام کرنا ہے. کاروباری برادری کے مسائل کا حل اولین ترجیح ہے، حکومت آپکا بھرپور ساتھ دے گی. حکومت کاروباری برادری کی سہولت کیلئے ہر ممکن اقدام اٹھا رہی ہے. ایف بی آر کی ڈیجیٹائیزیشن اور دیگر اصلاحات کی بدولت کاروباری برادری کو سہولت فراہم کر رہے ہیں۔ فیس لیس کسٹم کلیئرئنس سسٹم سے بندرگاہوں پر کنٹینرز کی کلیئرنس کے وقت میں خاطر خواہ کمی آئی ہے۔ صنعتوں کو بہترین افرادی قوت کی فراہمی کیلئے نوجوانوں کو تربیت کی فراہمی یقینی بنا رہے ہیں. پیشہ ورانہ تربیت فراہم کرنے والے تمام اداروں کو ایک چھتری تلے جمع کر کے نظام کو مزید مربوط بنا رہے ہیں۔
ملاقات میں وفد کے شرکاء نے گفتگو کرتے ہوئے کہاکہ وزیرِاعظم کی قیادت میں ملک معاشی استحکام کے بعد ترقی کی جانب بڑھ رہا ہے۔
اڑان پاکستان پروگرام اور اس کے تحت معیشت کی ترقی کے روڈمیپ قابل تعریف ہیں.وزیرِ اعظم کی قیادت میں محصولات میں اضافے، شرح سود اور مہنگائی میں کمی پر وزیرِ اعظم کو خراج تحسین پیش کرتے ہیں۔
