عمان، 11 مارچ(اے پی پی):وفاقی وزیر تجارت جام کمال خان تین روزہ سرکاری دورے پر عمان پہنچ گئے۔ اس دورے میں اعلیٰ سطحی ملاقاتیں، صنعتی زونز کا دورہ، اور ثقافتی سرگرمیاں شامل ہیں، جن کا مقصد پاکستان اور عمان کے درمیان تجارتی اور اقتصادی تعلقات کو مزید فروغ دینا ہے۔
مسقط انٹرنیشنل ایئرپورٹ پر پاکستانی سفارت خانے کے سفارتی نمائندوں-سفیر سید نوید صفدر بخاری، ڈپٹی ہیڈ آف مشن بلال حسن، اور کمرشل قونصلر عشرت حسین بھٹی نے ان کا پرتپاک استقبال کیا۔ عمانی حکام میں منسٹر کاؤنسلر راشد الرشدی اور ریلیشنز اسپیشلسٹ عبداللہ الجابری بھی ان کے استقبال کے لیے موجود تھے۔
اپنے دورے کے دوران، وفاقی وزیر 11 مارچ کو صحارپورٹ اور صحارفری زون کا دورہ کریں گے، جو عمان کا سب سے بڑا صنعتی زون ہے۔ وہاں انہیں سی ای او صحار پورٹ کی جانب سے پورٹ کی سہولیات پر تفصیلی بریفنگ دی جائے گی۔ اس کے علاوہ، وہ صحار چیمبر آف کامرس کے چیئرمین سے بھی ملاقات کریں گے تاکہ سرمایہ کاری اور تجارتی مواقع پر تبادلہ خیال کیا جا سکے۔12 اور 13 مارچ کو وزیر تجارت کی مصروفیات میں عمان کے اہم حکومتی اور کاروباری رہنماؤں سے ملاقاتیں شامل ہیں۔ وہ عمان کے وزیر برائے تجارت، صنعت اور سرمایہ کاری پروموشن قیس الیوسف اور وزیر برائے زراعت، ماہی گیری اور آبی وسائل ڈاکٹر سعود الحبسی سے ملاقات کریں گے۔ مزید برآں، عمان چیمبر آف کامرس اینڈ انڈسٹری کے چیئرمین فیصل الرواص سے ملاقات کے بعد ایک سرکاری افطار ڈنر کا اہتمام بھی کیا جائے گا۔13مارچ کو، وزیر تجارت انویسٹ عمان لاؤنج کا دورہ کریں گے اور عمان کے وزیر برائے ٹرانسپورٹ، کمیونیکیشن اور انفارمیشن ٹیکنالوجی سعید الموالی سے ملاقات کریں گے، جس میں تجارت اور لاجسٹکس کے شعبے میں تعاون کے فروغ کےمواقع پر تبادلہ خیال کیا جائے گا۔
سرکاری ملاقاتوں کے علاوہ، وزیر تجارت عمان کے ثقافتی مقامات کا بھی دورہ کریں گے، جن میں رائل اوپیرا ہاؤس مسقط اور سلطان قابوس گرینڈ مسجد شامل ہیں۔ اس اقدام کا مقصد دونوں ممالک کے درمیان ثقافتی تعلقات کو مزید مضبوط کرنا ہے۔
یہ سرکاری دورہ 14 مارچ کو مکمل ہوگا، جس کے بعد امید کی جا رہی ہے کہ پاکستان اور عمان کے درمیان دوطرفہ تجارتی، سرمایہ کاری اور ثقافتی تعلقات کو مزید فروغ ملے گا۔
