اسلام آباد، 19 مارچ(اے پی پی): وفاقی وزیر تجارت جام کمال خان سے یورپی یونین کی سفیر ڈاکٹر رینا کیونکا نے ملاقات کی،جس میں پاکستان اور یورپی یونین کے درمیان تجارتی تعاون اور سرمایہ کاری کے فروغ پر تبادلہ خیال کیا گیا۔
ملاقات کے دوران یورپی یونین-پاکستان بزنس فورم کے انعقاد پر بھی گفتگو ہوئی، جو 14 اور 15 مئی کو اسلام آباد میں منعقد ہوگا۔ اس فورم کا مقصد دونوں خطوں کے درمیان تجارتی مواقع کو بڑھانا اور سرمایہ کاری کے لیے مزید امکانات تلاش کرنا ہے۔ یورپی یونین کی جانب سے وفاقی وزیر تجارت کو بزنس فورم میں اختتامی خطاب کے لیے باضابطہ دعوت دی گئی۔
بزنس فورم کے دوران یورپی یونین-پاکستان بزنس نیٹ ورک (EUPBN) کا بھی باضابطہ آغاز کیا جائے گا، جس کے ذریعے پاکستان میں کام کرنے والی 300 سے زائد یورپی کمپنیوں کا مشترکہ نیٹ ورک قائم ہوگا۔ اس نیٹ ورک کے قیام کا مقصد تجارتی سرگرمیوں کو مزید فروغ دینا اور دونوں خطوں کے کاروباری اداروں کے درمیان تعاون کو مستحکم کرنا ہے۔
وفاقی وزیر تجارت جام کمال خان نے یورپی یونین کی تجارتی سرگرمیوں کو سراہتے ہوئے کہا کہ پاکستان یورپی ممالک کے ساتھ اقتصادی تعلقات کو مزید مضبوط کرنے کا خواہاں ہے۔ انہوں نے اس امید کا بھی اظہار کیا کہ دونوں خطوں کے درمیان کاروباری روابط مزید مستحکم ہوں گے۔
یورپی یونین پاکستان کا دوسرا سب سے بڑا تجارتی شراکت دار ہے، اور دونوں کے درمیان دوطرفہ تجارت کا حجم 12 ارب یورو تک پہنچ چکا ہے۔ اس فورم کے ذریعے مزید تجارتی مواقع پیدا ہونے اور دونوں معیشتوں کو فائدہ پہنچنے کی توقع کی جا رہی ہے۔
