اسلام آباد،3مارچ(اے پی پی):ترجمان پاور ڈویژن کے مطابق وفاقی وزیر توانائی سردار اویس احمد خان لغاری کا پاور سیکٹر انٹرنیشنل ڈویلپمنٹ پارٹنرز کے ساتھ پاور سیکٹر ریفارمز پر اجلاس بروز پیر منعقد ہوا ۔
اجلاس میں ترقیاتی شراکت داروں کی قیادت کنٹری ڈائریکٹر ورلڈ بینک ناجی بینہسین نے کی۔
ترجمان پاور ڈویژن کے مطابق وفاقی وزیر نے صارفین بالخصوص صنعت کے لئے سستی بجلی کے حوالے سے اصلاحات کے بارے میں آگاہ کیا۔
وفاقی وزیر توانائی اویس لغاری نے کہا کہ ان اصلاحات سے پاور ڈویژن کی کارکردگی اور نظم و ضبط بہتر ہو گا۔
آئی پی پیز کے ساتھ مذاکرات آزاد، منصفانہ اور شفاف ہیں۔آئی پی پیز کے پاس مذاکرات نہ کرنے یا ثالثی اور فرانزک آڈٹ کا آپشن ہے۔
اویس لغاری نے کہا کہ ملک کی معیشت کے لیے بجلی کے ٹیرف کو معقول بنانے کی اہمیت پر زور دیتا ہوں۔
تمام ترقیاتی شراکت داروں کو شانہ بشانہ لے کر چلیں گے۔وفاقی وزیر توانائی اویس لغاری نے کہا کہ اصلاحات میں فرنس آئل پر مبنی پلانٹس کا خاتمہ اور درآمدی کوئلے کو مقامی کوئلے میں تبدیل کرنا شامل ہے۔
انھوں نے کہا کہ نیٹ میٹرنگ کی ریشنلائزیشن بھی کی جائے گی جس سے باقی صارفین پر اضافی بوجھ نہیں پڑے گا
شرکاء نے اصلاحات کو سراہا اور مکمل تعاون کا یقین دلایا۔
