اسلام آباد ،24 مارچ (اے پی پی ):وزیراعظم کی زیر صدارت پرائم منسٹر رمضان ریلیف پیکج 2025 کے حوالے سے جائزہ اجلاس منعقد ہوا۔
اجلاس سے خطاب کرتے ہوئے وزیراعظم نے کہا کہ رمضان پیکیج پورے پاکستان بشمول گلگت بلتستان اور آزاد جموں و کشمیر کے لیے بلاتفریق متعارف کروایا گیا ہے،اس پیکج کو شفاف بنانے کے لیے اسٹیٹ بینک آف پاکستان،نادرا اور ٹیک اداروں کی کاوشیں لائق تحسین ہیں ۔
وزیراعظم نے رمضان ریلیف پیکج کا تھرڈ پارٹی آڈٹ کرنے کی ہدایت کی،رمضان ریلیف پیکج میں پیسے مستحقین تک ڈیجیٹل والٹ کے انتہائی سہل اور شفاف نظام کے ذریعے پہنچائے جا رہے ہیں؛اس ماڈل کو دیگر حکومتی اسکیموں میں اپنایا جائے ۔
وزیراعظم نے رمضان ریلیف پیکج کے حوالے سے ٹیلی کام کمپنیوں اور بینکوں کی جانب سے چلائی جا رہی آگاہی مہم کو مزید مؤثر بنانے اور اس حوالے سے ایک جامع رپورٹ ترتیب دینے کی ہدایت کی۔
اجلاس کو رمضان ریلیف پیکج 2025 کے حوالے سے پیش رفت پر بریفنگ دی گئی۔بریفنگ میں بتایا گیا کہ وزیراعظم رمضان ریلیف پیکج کے حوالے سے 2224 ملازمین ڈیوٹی پر مامور ہیں،رمضان ریلیف پیکج کے حوالے سے اب تک ڈیڑھ ملین سے زیادہ مستحقین کو ٹیلیفون کالز کی جاچکی ہیں ۔
