لاہور، 29 مارچ (اے پی پی): ہونڈا اٹلس کارز پاکستان نے مکمل تیار شدہ یونٹس کی ملک سے پہلی برآمد کا آغاز کر دیا۔ یہ تقریب ہونڈا کے پلانٹ میں منعقد ہوئی جس کے مہمانِ خصوصی وزیراعظم کے معاون خصوصی برائے صنعت و پیداوار، ہارون اختر خان تھے۔
ہونڈا اٹلس کارز پاکستان لمیٹڈ (HACPL) نے کامیابی سے ہونڈا سٹی 1.2L کی 40 گاڑیوں کی پہلی کھیپ جاپان کو برآمد کی، جو پاکستان کی گاڑیوں کی عالمی منڈی میں شمولیت کی جانب ایک اہم قدم ہے۔
ہارون اختر خان نے ہونڈا اٹلس کے پلانٹ کا دورہ کیا اور ادارے کی جدید سہولیات، معیار اور برآمدات کے لیے خدمات کو سراہا، اور اسے حکومت کے معاشی ترقی کے اہداف سے ہم آہنگ قرار دیا۔
اس موقع پر ہونڈا اٹلس کے چیئرمین عامر ایچ شیرازی نے کاروبار دوست ماحول کے فروغ میں حکومتی تعاون کو اجاگر کیا جبکہ HACPL کے صدر و سی ای او تاکافومی کوئیکے نے ہونڈا کی عالمی میراث اور ٹیکنالوجی میں جدت پر روشنی ڈالی۔
تقریب میں ربن کاٹنے کی رسم بھی ادا کی گئی جو برآمدی سفر کے باضابطہ آغاز کی علامت تھی، جبکہ ماحولیات کے تحفظ کے عزم کے طور پر پودا لگانے کی سرگرمی بھی منعقد کی گئی، جو ہونڈا کے عالمی ویژن کا حصہ ہے۔
اس موقع پر خطاب کرتے ہوئے معاون خصوصی ہارون اختر خان نے اس بات پر زور دیا کہ یہ کامیابی پاکستان کے عالمی آٹو مارکیٹ میں مقابلہ کرنے کی بڑھتی ہوئی صلاحیت کو ظاہر کرتی ہے۔ انہوں نے پبلک اور پرائیویٹ سیکٹر کے درمیان قریبی تعاون کو صنعتی ترقی کی کنجی قرار دیا، اور وزیرِ اعظم شہباز شریف کے برآمدی اور پائیدار صنعتی نظام کے وژن کا اعادہ کیا۔
ہارون اختر خان نے دیگر مقامی صنعتکاروں کو بھی ابھرتی ہوئی عالمی منڈیوں میں مواقع سے فائدہ اٹھانے کی تلقین کی اور اس اعتماد کا اظہار کیا کہ پاکستان جلد خطے میں آٹوموٹیو پروڈکشن اور برآمد کا مرکز بن سکتا ہے۔
اے پی پی/ قرۃالعین/
