سیالکوٹ، 23 مارچ (اے پی پی): ڈپٹی کمشنر محمد ذوالقرنین لنگڑیال نے کہا ہے کہ 23 مارچ تجدید عہد کا دن ہے اس روز برصغیر کے مسلمانوں کے مذہبی تشخص، ثقافت اور روایات کی بقا کیلئے الگ، آزاد اور خود مختار ریاست کی بنیاد رکھی گئی اور قائد اعظم محمد علی جناح کی قیادت میں 14 اگست 1947 کو دنیا کے نقشے پر پہلی نظریاتی ریاست پاکستان کا قیام عمل میں آیا اور آج سبز ہلالی پرچم کے سائے تلے ہم ایک آزاد اور درجہ اول کے شہری کے طور پر مکمل مذہبی آزادی سے زندگی بسر کررہے ہیں۔
یہ بات انہوں نے آج ڈی سی آفس کے سبزہ زار میں یوم پاکستان کی تقریب سے خطاب کرتے ہوئے کیا۔ڈپٹی کمشنر محمد ذوالقرنین لنگڑیال نے کہا کہ ملک پاکستان بلا شبہ ایک مشکل دور سے گزر رہا ہے اور اللہ کے فضل سے یہ تمام چیلنجز کا مقابلہ کرتا ہوا ایک مضبوط اور فلاحی ریاست بنے گا۔ انہوں نے کہا کہ پاکستان عظیم عطیہ خداوندی ہے اور برصغیر کے مسلمانوں کو الگ ملک نہ ملتا تو ان کو ہندو کانگریس کے واردا اور ودیا ایجوکیشن سسٹم اور کلچرل کے تحت زندگی بسر کرنے پر مجبور ہوتے اور ان کو معاشرے میں نچلے درجے کا شہری رہتے ہوئے زندگیاں بسر کرنی پڑتی۔
ڈپٹی کمشنر نے کہا کہ آج ہمیں تحریک آزادی پاکستان کے رہنماؤں اور کارکنان کا بھی شکریہ ادا کرنا ہے جن کی بدولت ہمیں پاکستان ملا۔
قبل ازیں ڈپٹی کمشنر محمد ذوالقرنین لنگڑیال نے پرچم کشائی کی رسم انجام دی اور ریسکیو1122 اور سول ڈیفنس کے دستوں نے قومی پرچم کو سلامی پیش کی۔ تقریب کے آخر میں ملک و قوم کی سلامتی اور استحکام کیلئے دعا کی گئی۔
تقریب میں اسسٹنٹ کمشنر انعم بابر ، سی او میونسپل کارپوریشن ملک اعجاز ، سی ای او ایجوکیشن مجاہد حسین علوی اور سول ڈیفنس آفیسر شاہد محمود کے علاؤہ سول ڈیفنس کے رضاکاروں اور شہریوں نے کثیر تعداد میں شرکت کی۔
