اسلام آباد،3مارچ(اے پی پی): وفاقی وزیر اطلاعات و نشریات عطاءاللہ تارڑ نے کہا ہے کہ 4 مارچ 2025ءکو مسلم لیگ (ن) کی مخلوط حکومت کا ایک سال مکمل ہو جائے گا، آج مہنگائی کی سطح 23 فیصلد سے 1.5 فیصد کی کم ترین سطح پر آ چکی ہے، سٹاک ایکسچینج میں بہتری آ رہی ہے،پاکستان میں ایک بار پھر کھیل کے میدان آباد ہو رہے ہیں، مختلف ممالک کے وفد اور وزراء و سربراہان ملک کا دور کر رہے ہیں۔ وزیراعظم ایک سال کی کارکردگی پر عوام اعتماد میں لیں گے۔
اسلام آباد میں پریس کانفرنس سے خطاب کرتے ہوئے کہا کہ محمد شہباز شریف نے 4 مارچ 2024ءکو اپنے عہدے کا حلف اٹھایا تھا، ملک کی سمت کے حوالے سے بہت سی قیاس آرائیاں چل رہی تھیں، بہت سے لوگوں نے شرطیں لگا رکھی تھیں کہ معیشت نہیں سنبھلے گی، ملک ڈیفالٹ کے دھانے پر ہے اور ایک سیاسی جماعت نے پاکستان کے خلاف آئی ایم ایف کو خطوط لکھے تھے۔
انہوں نے کہا کہ کچھ چیزیں سیاست سے بالاتر ہوتی ہیں، ہم نے ریاست کے لئے اپنی سیاست قربان کر دی وزیراعظم شہباز شریف کی قیادت میں ملکی مفاد میں فیصلے کئے گئے۔ 9 سال پانچ ماہ پہلے ستمبر 2015ءمیں مہنگائی 1.3 فیصد تھی، ساڑھے 9 سال کے بعد آج مہنگائی کی کم ترین سطح ہے۔
عطاء تارڑ نے کہا کہ خارجہ محاذ پر پی ٹی آئی دور حکومت میں پاکستان عالمی سطح پر تنہائی کا شکار تھا جب کہ وزیراعظم کے دورہ ازبکستان کے موقع پر پاکستان کا پرچم ہر شاہراہ پر دیکھا گیا۔آج عالمی سطح پر پاکستان کے لئے اچھے جذبات اور تاثرات کا اظہار کیا جا رہا ہے۔
