اسلام آباد،23 اپریل(اے پی پی): اسلام آباد میں عوام کی سہولت کے لئے متعدد نئے منصوبے شروع کرنے کا فیصلہ، وفاقی وزیرداخلہ محسن نقوی کی زیرصدارت اجلاس میں عوامی منصوبوں کی باضابطہ منظوری دے دی گئی۔
ٹریفک نظام کو مزید بہتر بنانے کے لئے فیض آباد انٹر چینج کی ری ماڈلنگ کا فیصلہ، فیض آباد انٹرچینج کی توسیع او مزید دو لینز بڑھانے کے پراجیکٹ کی منظوری دے دی گئی ۔
فیصل چوک کے مقام پر ٹریفک کے بہاؤ کو بہتر بنانے کیلئے انڈر پاس کی تعمیر کا فیصلہ بھی کیا گیا ہے، فیصل چوک پر 2+2 لین کے انڈر پاس پراجیکٹ کی منظوری دے دی گئی۔وزیرداخلہ محسن نقوی نے انڈر پاس کو مستقبل کی ضروریات کو مدِنظر رکھتے ہوئے پلاننگ کرنے کی ہدایت دی۔
بلیو ایریا میں مکمل شدہ پارکنگ پلازے کو جلد فعال کرنے کا فیصلہ بھی کیا گیا ہے۔وزیرداخلہ محسن نقوی نے فوڈ سٹریٹ و پارکنگ پلازہ کیلئے بہترین بزنس ماڈل تیار کرنے کی ہدایت کی اور کہا کہ شہر کے دیگر مقامات پر پارکنگ پلازوں کی تعمیر کیلئے مقامات کی نشاندہی جلد کی جائے۔
وفاقی وزیر داخلہ محسن نقوی کی زیر صدارت سی ڈی اے میں اہم اجلاس ہوا۔ وزیر مملکت داخلہ طلال چوہدری، وفاقی سیکرٹری داخلہ خرم آغا، چیئرمین سی ڈی اے محمد علی رندھاوا، آئی جی پولیس سید علی ناصر رضوی، سی ڈی اے بورڈ ممبران، ضلعی انتظامیہ اور سنئیر افسران نے اجلاس میں شرکت کی۔
اجلاس میں ٹریفک کے مسائل کو مستقل بنیادوں پر حل کرنے کیلئے مختلف منصوبوں پر بریفنگ دی گئی۔ اجلاس کو بتایا گیا کہ بلیو ایریا فوڈ سٹریٹ میں پیڈسٹرین ٹریکس، فوڈ سٹالز اور پارکنگ کی جگہوں کا انتخاب کیا جاچکا ہے۔ فوڈ سٹریٹ میں شہریوں کے بیٹھنے کیلئے بینچز اور تفریحی سرگرمیوں کیلئے بھی جگہ مختص کرلی گئی ہے۔
اجلاس کو بتایا گیا کہ بلیو ایریا پارکنگ پلازہ میں کمرشل دکانیں، روف ٹاپ ریستوران، پلے لینڈ ،سینما اور دیگر سہولتیں فراہم کی جائیں گی۔
