اسلام آباد ،15اپریل (اے پی پی):اسپیکر قومی اسمبلی سردار ایاز صادق نے فارن سروس اکیڈمی اسلام آباد میں پاسنگ آوٹ ہونے والے افسران سے خطاب کرتے ہوئے کہا کہ نوجوان افسران ملک کے سفیر ہیں اور پاکستان کا روشن مستقبل ہیں۔
انہوں نے کہا کہ نوجوان افسران کی محنت اور کامیابی پر ہم سب کو آپ پر فخر ہے۔ بیرون ممالک کے ساتھ رابطوں کو فروغ دینا سفارت کاروں کی ذمہ داری ہے۔پاکستان کے مثبت تاثر کو اجاگر کرنا آپ سب کی اولین ترجیح رہے گی۔دنیا بدل رہی ہے آپ کی ذمہ داری ہے کے آپ جدید تقاضوں سے ہم آہنگ رہیں۔
ا سپیکر قومی اسمبلی نے کہا کہ اوورسیز پاکستانیوں کے مسائل کا حل آپ کی اولین ترجیح ہونی چاہیئے،انہوں نے کہا کہ پاکستان کو دہشتگردی اور موسمیاتی تبدیلیوں جیسے سنگین مسائل کا سامنا ہے،مذاکرات ہی تمام مسائل کا حل ہیں لیکن دہشتگردوں اور ریاست مخالف عناصر سے آہنی ہاتھوں سے نمٹا جائے گا۔
انہوں نے کہا کہ انسانی حقوق کی پاسداری پر بات کرنے والوں کو غزہ اور کشمیر میں ہونے والی انسانی حقوق کی خلاف ورزیوں کابھی نوٹس لینا چاہئے۔
اسپیکر قومی اسمبلی سردار ایاز صادق کا کہنا تھا کہ سفارت کاری میں پارلیمان کا کردار بہت اہم ہوتا ہے،بطور اسپیکر ہمیشہ پاکستان کے مثبت اور حقیقی تاثر کو اجاگر کیا ہے۔ بطور اسپیکر اپوزیشن کے تمام ارکان کے پروڈکشن آرڈرز جاری کیے اور سیاسی انتقام کی روایت کو بدلا، انہوں نےمزید کہا کہ افغانستان میں چھوڑا ہوا اسلحہ اب پاکستان خلاف استعمال کیا جا رہا ہے۔
