لاہور، 20 اپریل(اے پی پی): افریقہ ہاؤس پاکستان اور وزارت خارجہ کے اشتراک سے افریقی ممالک کے وزراء اور بزنس کمیونٹی کے اعزاز میں استقبالیہ تقریب کا اہتمام کیا گیا۔
پاکستان اسٹیٹ گیسٹ ہاؤس میں منعقدہ تقریب میں صوبائی وزیر صنعت و تجارت چوہدری شافع حسین نے خصوصی شرکت کی۔
چیئرمین افریقہ ہاؤس محمد ریحان یونس،ایمبیسڈر حامد اصغر خان ،یوگنڈا کے وزیر زراعت فریڈریک ،افریقی ممالک اور پاکستان کی بزنس کمیونٹی نے تقریب میں شرکت کی۔تقریب میں پاکستان افریقہ فرینڈز شپ کا کیک بھی کاٹا گیا۔
صوبائی وزیر صنعت و تجارت چوہدری شافع حسین نے کہا کہ پاکستان اور افریقی ممالک کے مابین موجود سرمایہ کاری اور تجارتی خلا دور کرنا ہوگا، وقت آگیا ہے کہ پاکستان اور افریقی ممالک کے مابین تجارتی حجم بڑھایا جائے۔
انھوں نے کہا کہ پنجاب کے سپیشل اکنامک زونز میں غیر ملکی سرمایہ کاروں کو خصوصی مراعات حاصل ہیں اور کہا کہ افریقی ممالک کے سرمایہ کاروں کی پنجاب میں سرمایہ کاری کا خیر مقدم کریں گے۔
انھوں نے کہا کہ وزیر اعلیٰ پنجاب کی ہدایت پر ٹیکسٹائل سیکٹر کے فروغ کیلئے گارمنٹ سٹی بنایا جا رہا ہے، گارمنٹ سٹی میں،مقامی سرمایہ کاروں کے علاوہ چین اور دیگر غیر ملکی سرمایہ کار ٹیکسٹائل انڈسٹری لگا رہے ہیں۔ پاکستان اور افریقی ممالک ٹیکسٹائل سیکٹر میں اشتراک کر سکتے ہیں۔
صوبائی وزیر نے کہا کہ قائد اعظم بزنس پارک شیخوپورہ میں 130ایکڑ رقبے پر فارما سیوٹیکل ویلی بنائی جا رہی ہے۔ پنجاب کے ٹیکسٹائل ،فارماسیوٹیکل، سرجیکل ،سپورٹس اور دیگر شعبوں میں سرمایہ کاری کا بڑا پوٹینشل موجود ہے۔
چوہدری شافع حسین نے کہا کہ پاکستان اور پنجاب معدنی وسائل کی دولت سے مالا مال ہے،مائننگ سیکٹر میں افریقی ممالک کو مہارت حاصل ہے۔ پاکستان مائننگ کے شعبہ میں افریقی ممالک کی مہارت سے فائدہ اٹھا سکتا ہے۔
انھوں نے کہا کہ پنجاب میں سازگار ماحول کے باعث غیر ملکی سرمایہ کاری آرہی ہےاور کہا کہ چین کی موبائل کمپنی نے انڈسٹریل اسٹیٹ فیصل آباد میں موبائل فون مینوفیکچرنگ کا پلانٹ لگانا شروع کردیا ہے،سولر پینلز مینوفیکچرنگ اور لیتھیئم بیٹریاں بنانے والی غیر ملکی کمپنیاں بھی پنجاب میں اپنے کارخانے لگائیں گی۔
یوگنڈا کے وزیر زراعت فریڈریک نے یوگنڈا میں سرمایہ کاری کے مواقع سے آگاہ کیا۔
چیئرمین افریقہ ہاؤس ریحان یونس نے کہا کہ افریقہ ہاؤس پاکستان کی انڈسٹری اور افریقن مارکیٹ کیلئے گیٹ وے کی حیثیت رکھتا ہے۔
ایمبیسڈرحامد اصغر خان نے کہا کہ پاکستان اور افریقی ممالک کے مابین تجارتی حجم بڑھانے کیلئے کوشاں ہیں۔
سیکرٹری ٹی ڈیپ شہریار خان ،صدرایوان صنعت و تجارت ابوذر شاد اور دیگر نے بھی تقریب سے خطاب کیا ۔
اے پی پی/لاہور/فرح
