اسلام آباد، 1اپریل(اے پی پی):وزیرِاعظم پاکستان کی ہدایت پر این ڈی ایم اے کی جانب سے میانمار میں زلزلہ متاثرین کیلئے امدادی سامان کی ترسیل کا عمل شروع ہوگیا ہے پاکستان کی جانب سے امدادی سامان کی پہلی کھیپ میں 35 ٹن امدادی اشیاء شامل ہیں۔
امدادی سامان کی روانگی تقریب میں وفاقی وزیر برائے پارلیمانی امور ڈاکٹر طارق فضل چوہدری نے شرکت کی۔تقریب میں این ڈی ایم اے ، وزارت خارجہ کے اہلکار اور میانمار کے سفیر کی بھی شریک تھے۔
وفاقی وزیر ڈاکٹر طارق فضل چوہدری نے میڈیا سے گفتگو کرتے ہوئے کہا کہ وزیراعظم کی ہدایت زلزلہ متاثرین کے لئیے مجموعی طور پر 70ٹن امدادی سامان میانمار روانہ کیا جا رہا ہے۔وزیراعظم اور حکومتِ پاکستان اس مشکل گھڑی میں میانمار کی عوام کے ساتھ کھڑے ہیں۔وفاقی وزیر ڈاکٹر طارق فضل نے میڈیا سے گفتگو میں وزیراعظم شہباز شریف کی جانب سے میانمار کی عوام کےلئے اظہارِ ہمدردی کا خصوصی پیغام بھی دیا ۔
امدادی سامان میں خیمے، ترپالیں، کمبل، تیار کھانا، ادویات اور واٹر ماڈیولز شامل ہیں، امداد بردار طیارہ میانمار کے شہر ینگون پہنچے گا۔وفاقی وزیر نے وزیراعظم کی ہدایت پر فوری امدادی سامان کی ترسیلی عمل پر این ڈی ایم اے کو سراہا ۔
اس موقع پر میانمار کے سفیر نے امدادی سامان کے اقدامات پر حکومت پاکستان اور پاکستانی عوام کا شکریہ ادا کیا۔
