اقوام متحدہ،3 اپریل(اے پی پی):سفیر عاصم افتخار احمد نے اقوام متحدہ کے سیکریٹری جنرل کو اپنی اسناد پیش کر دی ہیں اور پاکستان کے مستقل مندوب کا منصب سنبھال لیا ہے۔
آج سفیر عاصم افتخار احمد نے اقوام متحدہ کے سیکریٹری جنرل انتونیو گوتیرش (Antonio Guterres)کو اپنی اسناد پیش کیں اور پاکستان کے مستقل مندوب برائے اقوام متحدہ کا منصب سنبھال لیا۔
اس موقع پر ملاقات کے دوران، سفیر عاصم نے اقوام متحدہ کے منشور اور کثیر الجہتی سفارت کاری کے لیے پاکستان کے غیر متزلزل عزم کا اعادہ کیا۔
سیکریٹری جنرل گوتیرش نے سفیر عاصم کو ان کے نئے منصب پر مبارکباد دی اور ان کی کامیاب مدتِ ملازمت کے لیے نیک خواہشات کا اظہار کیا۔
سفیر عاصم افتخار احمد نے سفیر منیر اکرم کی جگہ لی ہے، جو 31 مارچ 2025 کو اپنی مدت مکمل کرنے کے بعد یہ منصب چھوڑ گئے تھے۔سفیر عاصم افتخار احمد نے 1993 میں پاکستان کی فارن سروس میں شمولیت اختیار کی۔ تین دہائیوں پر محیط اپنے سفارتی کیریئر کے دوران، انہوں نے یورپ، افریقہ، ایشیا اور اقوام متحدہ سمیت مختلف خطوں میں نمایاں خدمات انجام دیں، وزارتِ خارجہ اور پاکستان کے سفارتی مشنز میں مختلف اہم عہدوں پر فائز رہے۔
