اسلام آباد، 25 اپریل(اے پی پی):صدر آصف علی زرداری سے وزیر داخلہ محسن نقوی نے جمعہ کو اہم ملاقات کی۔
ملاقات میں صدر آصف علی زرداری کا کہنا تھا قومی سلامتی کمیٹی نے پاکستانی قوم کی امنگوں کی ترجمانی کی ہے۔ قومی سلامتی کمیٹی کے تمام فیصلے قوم کے دل کی آواز ہیں اور کہا کہ پوری قوم سلامتی کمیٹی کے فیصلوں اور اقدامات کے ساتھ کھڑی ہے۔صدر پاکستان کا کہنا تھا کہ بھارت کے بے بنیاد الزامات اور غیر منطقی اقدامات کا کوئی جواز نہیں بنتا۔
وفاقی وزیرداخلہ محسن نقوی نے ملاقات میں صدر آصف علی زرداری کو قومی سلامتی کمیٹی کے فیصلوں کے بارے بریف کیا۔
وزیر داخلہ محسن نقوی نے پہلگام واقعہ کے بعد بھارت کے غیر ذمہ دارانہ اقدامات کے تناظر میں تفصیلی بریفنگ دی۔انھوں نے بھارت کے غیر ذمہ دارانہ اقدامات کے بعد قومی سلامتی کمیٹی کی جانب سے جوابی اقدامات سے صدر آصف زرداری کو آگاہ کیا۔
صدر آصف علی زرداری نے قومی سلامتی کمیٹی کے بروقت۔ فوری اور دور اندیش قومی اقدامات اور فیصلوں کو سراہا۔
وزیر داخلہ کا کہنا تھا کہ دشمن کسی غلط فہمی میں نہ رہے،پاکستان کا دفاع الْحَمْدُلِله ناقابل تسخیر ہے۔
