اسلام آباد،17اپریل (اے پی پی):نائب وزیر اعظم اور وزیر خارجہ سینیٹر محمد اسحاق ڈار نے وزارت خارجہ آمد پر ہنگری کے وزیر خارجہ و تجارت پیٹر سیجارٹو کا پرتپاک استقبال کیا۔ دونوں وزرا کے درمیان وفود کی سطح پر بات چیت ہوئی جس میں تجارت، توانائی، زراعت، سائنس، ثقافت اور تعلیم میں تعاون کو مزید وسعت دینے پر تبادلہ خیال کیا۔
بات چیت میں اہم علاقائی اور عالمی امور پر بھی تبادلہ خیال کیا گیا۔ نائب وزیر اعظم اور وزیر خارجہ سینیٹر محمد اسحاق ڈار اور ہنگری کے وزیر خارجہ و تجارت نے کثیرالجہتی فورمز پر دونوں ممالک کے درمیان تعاون کو مضبوط بنانے پر بھی اتفاق کیا جبکہ پاکستان اور ہنگری کے درمیان کئی معاہدوں اور ایم او یوز پر بھی دستخط کیے گئے ان میں ثقافتی تبادلہ پروگرام (2025/2027) کے علاوہ آثار قدیمہ اور ورثہ تعاون، سفارتی پاسپورٹ کے لیے ویزا کی چھوٹ شامل ہیں۔
اس دورے نے دونوں ملکوں کے درمیان سفارتی تعلقات کے 60 سال مکمل ہونے پر امن، سلامتی اور مشترکہ خوشحالی کے لیے دوطرفہ تعاون کو وسعت دینے کے لیے مضبوط شراکت داری اور عزم کو تقویت دی ہے۔
