اسلام آباد،15 اپریل (اے پی پی): اسپیکر قومی اسمبلی سردار ایاز صادق سے میڈیا کے نمائندوں نے ملاقات کی۔ اس موقع پراسپیکر قومی اسمبلی سردار ایاز صادق نے میڈیا کے نمائندوں سے گفتگو کرتے ہوئے کہا کہ فلسطین کے عوام کی حالت زار کو دیکھ کر دل رنجیدہ ہوتا ہے، پاکستان کی حکومت اور عوام فلسطین کی عوام کے ساتھ ہیں۔
پاکستان کا فلسطین پر موقف واضح اور نمایاں ہے، فلسطین کی معصوم عوام پر اسرائیل ظلم کر رہا ہے،ترکیہ کی اسمبلی کے سپیکر نے فلسطین کی صورت حال پر کانفرنس بلائی ہے،جس پر انہوں نے کانفرنس میں شرکت کیلئے مدعو کیا ہے، کانفرنس میں شرکت کروں گا اور پاکستان کا موقف پیش کروں گا۔
اسپیکر قومی اسمبلی سردار ایاز صادق کا کہنا تھا کہ اپوزیشن ہر معاملے پر سیاست کرتی ہے،ہر معاملے کو بات چیت کے ذریعے حل کیا جاسکتا ہے، میں مذاکرات کا مکمل یقین رکھتا ہوں،مذاکرات کیلئے ہمیشہ سنجیدہ کوششیں کی ہیں۔
انہوں نے کہا کہ امریکی کانگرس کے دورہ پاکستان کے موقع پر بھی اپوزیشن نے سیاست کی، امریکی وفد نے بانی چیئرمین کا کوئی ذکر نہیں کیا،امریکی کانگرس کے وفد نے واضح کیاہے کہ پاکستان کے اندرونی سیاسی معاملات سےان کا کوئی تعلق نہیں ہے۔
اپوزیشن کے ایوان میں غیر سیاسی روئیے پر بات کرتے ہوئے اسپیکر قومی اسمبلی کا کہنا تھا کہ ایوان میں کنیالز کے معاملے پر بات کرنے کے موقع پر اپوزیشن نے واک آؤٹ کیا،ایوان کو خوش اسلوبی سے چلانے کے لیے حکومت کے ساتھ ساتھ اپوزیشن کی بھی ذمہ داری ہے۔
اسپیکرنے میڈیا کے نمائندوں کو آگاہ کیا کہ اپوزیشن لیڈر کی جانب سے جمع کرائے گے سوالات اور توجہ دلاؤ نوٹسز کو ایجنڈے میں نا شامل کرنے کے حوالے سے انکے اعتراض کا ریکارڈ کے ساتھ تفصیلی خط ارسال کر دیا ہے۔
اسپیکر سردار ایاز صادق کا کہنا تھا کہ اسمبلی میں کینالز کے معاملے پر 30 سے زائد اراکین نے اجلاس میں بات کی،پیپلز پارٹی نے کینالز پر بات کرنے کے لیے 7 اپریل جبکہ اپوزیشن نے 10 اپریل کو قرارداد جمع کرائی،ڈپٹی وزیراعظم سینیٹر اسحاق ڈار نے کینالز کے معاملے پر حکومتی موقف واضح طور پر پیش کیا۔
انہوں نے کہا کہ کورم پورا کرنا حکومت کی ذمہ داری ہے،وزیر پارلیمانی امور کو کئی بار آگاہ کیا کہ قانون سازی کرانی ہے تو کورم کو پورا کیا جائے،گرفتار اراکین کیلئے پروڈکشن آرڈر جاری کیے،اپوزیشن کے زیر حراست ممبران کیلئے پارلیمنٹ لاجز کو سب جیل قرار دیاجبکہ ماضی کی حکومت نے پروڈکشن آرڈر جاری نہیں کیے تھے۔
اسپیکر سردار ایاز صادق نے کہا کہ فیصلہ کیا گیا تھا کہ وقفہ سوالات میں کسی کو پوائنٹ آف آرڈر نہیں دیا جائے گا، میری ہمیشہ سے یہ خواہش رہی ہے کہ وقفہ سوالات کو مکمل کیا جائے،وقفہ سوالات میں عوامی اہمیت کے حامل مسائل پر سوالات و جوابات لیے جاتے ہیں۔
