منسک،11اپریل(اے پی پی):وزیراعظم محمد شہباز شریف نےپاکستان اور بیلاروس کے درمیان تعلقات میں حالیہ پیش رفت کو انتہائی مثبت قرار دیتے ہوئے دونوں ممالک کے پارلیمنٹیرینز کے تبادلوں اور پارلیمانی روابط میں مزید بہتری لانے کی خواہش کا اظہار کیاہے۔ جمعہ کو وزیر اعظم محمد شہباز شریف سے بیلاروس کی قومی اسمبلی کی کونسل آف ری پبلک کی چیئرپرسن نتالیہ کوچانووا اور ایوان نمائندگان کے چیئرمین ایگور سرجیینکو نے ملاقات کی۔ دونوں اطراف نے پاکستان اور بیلاروس کے ارکان پارلیمنٹ کے درمیان تعلقات کو مزید فروغ دینے پر تبادلہ خیال کیا۔ انہوں نے دوطرفہ تعلقات کو گہرا کرنے میں پارلیمانی رابطوں کی اہمیت کو اجاگر کیا اور تمام شعبوں میں تعاون بڑھانے کے اپنے عزم کا اعادہ کیا۔ اس موقع پر وزیراعظم نے کہا کہ پاکستان اور بیلاروس کے درمیان تعلقات میں حالیہ پیش رفت انتہائی مثبت ہے ۔ انہوں نے دونوں ممالک کے پارلیمنٹیرینز کے تبادلوں اور پارلیمانی روابط میں مزید بہتری لانے کی خواہش کا اظہار کیا۔ملاقات میں نائب وزیراعظم و وزیر خارجہ اسحاق ڈار ، وفاقی وزیر مواصلات عبدالعلیم خان، وفاقی وزیر تجارت جام کمال اور وفاقی وزیر اطلاعات و نشریات عطاء اللہ تارڑ بھی موجود تھے۔
