اسلام آباد۔28اپریل (اے پی پی):وزیر اعظم محمد شہباز شریف سے چین میں پاکستانی طلباء و طالبات کو زراعت کے شعبے میں جدید تربیت کے پروگرام کی نگرانی کیلئے مقررہائیر ایجوکیشن کمیشن کی پراجیکٹ ڈائریکٹر صائمہ نورین نے ملاقات کی ۔
اس موقع پر وزیر اعظم نے کہا کہ صائمہ نورین کا عوامی خدمت کا جذبہ سرکاری افسران کیلئے قابل تقلید ہے، ان کا طلبہ کے ساتھ چین جانا اور ان کے مسائل کو حل کرکے انہیں چینی یونیورسٹی میں قیام تک کے تمام انتظامات کی خود نگرانی کرنا قابل ستائش ہے۔
وزیراعظم نے کہا کہ ایسے افسران جو عوامی خدمت میں دن رات مصروف عمل ہیں وہی ترقی و مراعات کے اصل حقدار ہیں، اللہ کے فضل و کرم سے چین میں جدید زراعت کی تربیت کیلئے طلباء کی پہلی کھیپ پہنچ چکی ہے۔
ملاقات میں صائمہ نورین نے طلبہ کو اس تمام عمل کے دوران درپیش مسائل سے آگاہ کیا اور مستقبل میں انکے سد باب کیلئے سفارشات پیش کیں۔وزیر اعظم نے صائمہ نورین کی اعلی کارکردگی کے اعتراف میں انہیں تعریفی سند اور شیلڈ پیش کی۔ پراجیکٹ ڈائریکٹر نے بتایا کہ طلبہ شیان یونیورسٹی میں بحفاظت پہنچ چکے اور زیر تربیت ہیں۔وزیر اعظم نے پاکستانی طلباء و طالبات کو جدید زراعت کی تربیت کیلئے چین بھیجنے کے انتخاب کے طریقہ کار کی شفافیت جانچنے کیلئے تھرڈ پارٹی ویلیڈیشن کی ہدایت کی۔
ملاقات میں وفاقی وزراء رانا تنویر حسین، عطاء اللہ تارڑ اور اعلی افسران نے شرکت کی۔
