واشنگٹن ڈی سی، 23 اپریل (اے پی پی ): وفاقی وزیر برائے خزانہ و محصولات سینیٹر محمد اورنگزیب نے آئی ایم ایف-ورلڈ بینک اسپرنگ میٹنگز 2025 کے موقع پر سعودی فنڈ برائے ترقی (SFD) کے چیف ایگزیکٹو آفیسر، جناب سلطان بن عبدالرحمن المرشد سے ملاقات کی۔
وزیر خزانہ نے فروری 2025 میں سعودی عرب کے دورے اور العُلا میں منعقدہ ابھرتی ہوئی معیشتوں کی کانفرنس میں شرکت کے علاوہ سعودی وزیر خزانہ سے ہونے والی ملاقات کا حوالہ دیا۔ انہوں نے پاکستان کے بہتر ہوتے ہوئے معاشی اشاریوں پر بریفنگ دی اور بتایا کہ حال ہی میں موڈی نے پاکستان کی کریڈٹ ریٹنگ کو B- کر دیا ہے جس کے ساتھ مستحکم آؤٹ لک دیا گیا ہے۔
انہوں نے پاکستان میں سرمایہ کاری کے منصوبوں میں سرکاری سطح (G2G) اور نجی سطح (B2B) پر بڑھتی ہوئی دلچسپی کو سراہا۔ وزیر خزانہ نے سعودی آئل سہولت کے تحت واجب الادا رقوم کی فوری ادائیگی کی درخواست کی اور اس ضمن میں تیل کی ترسیل کے شواہد فراہم کرنے کی یقین دہانی کروائی۔
دونوں فریقین نے موجودہ منصوبہ جات کا جائزہ لیا اور وزیر خزانہ نے ان کی پیش رفت پر اطمینان کا اظہار کیا۔ انہوں نے SFD سے این-25 منصوبے کے لیے مالی معاونت کی درخواست بھی کی۔
