اسلام آباد،28اپریل (اے پی پی):وزیر دفاع خواجہ محمد آصف سے سری لنکا کے سیکرٹری دفاع ایئر وائس مارشل (ر)سمپتھ تھیویاکونتھا اور سری لنکن نیوی کے کمانڈر وائس ایڈمرل کنچنا بناگوڈا نے وفد کے ہمراہ ملاقات کی جس میں دونوں اطراف نے دفاعی تعاون کو مضبوط بنانے کے لئے باہمی رضامندی پر زور دیا۔وزیر دفاع نے پاکستان اورسری لنکا کے درمیان دیرینہ دوستی کو سراہا۔
انہوں نے کہا کہ اہم مسائل اور علاقائی تناظر میں نقطہ نظر کی قربت کو دیکھتے ہوئے دونوں ممالک کو کثیرالجہتی تعلقات کے مثبت انداز سے فائدہ اٹھاتے ہوئے موجودہ تعلقات کو مزید مضبوط کرنے کی ضرورت ہے۔
معزز مہمان نے پاکستان کی مسلح افواج کی پیشہ وارانہ مہارت کی تعریف کی، انسداد دہشت گردی میں ان کی کامیابیوں اور کوششوں کا اعتراف کیا۔فریقین نے دونوں ممالک کے درمیان جاری تعاون پر اطمینان کا اظہار کیا اور باہمی فائدہ مند شعبوں میں تعاون کو مضبوط بنانے کا عزم ظاہرکیا۔
