اسلام آباد۔1اپریل (اے پی پی):وزیر مملکت برائے ریلوے بلال اظہر کیانی نے ضلع جہلم کے گائوں دولت پور میں شہید کیپٹن حسنین اختر شہید کی قبر پر حاضری دی، فاتحہ خوانی کی اور پھول چڑھائے۔
بلال اظہر کیانی نے شہید کیپٹن حسنین اختر کی قبر پر پھول چڑھائے،فاتحہ خوانی کی اوراہل خانہ سے اظہار تعزیت کے لئے شہید کیپٹن حسنین اختر شہید کے گھر بھی گئے ۔
بلال اظہر کیانی نے کہا کہ کیپٹن حسنین اختر ڈی آئی خان میں فتنہ الخوارج کا مقابلہ کرتے ہوئے شہید ہوئے، قوم شہدا اوران کی قربانیوں کو کبھی نہیں بھول سکتی۔
انہوں نے کہا کہ قوم شہدا اور ان کے لواحقین کے ساتھ ہے، اپنی قیادت اور اہل جہلم کی جانب سے شہید کیپٹن حسنین اختر کو خراج عقیدت پیش کرتے ہیں۔ بلال اظہر کیانی نے کہا کہ جہلم کے ایک اور بیٹے نے وطن پر جان وار دی، جہلم شہیدوں اور غازیوں کی سر زمین ہے۔
انہوں نے کہا کہ جہلم کے ہر قبرستان میں شہدا آسودہ خاک ہیں، بلال اظہر کیانی نے کہا کہ شہدا کے عظیم اہل خانہ کے بلند حوصلے دہشت گردی کے خلاف قوم کے اجتماعی عزم کا مظہر ہیں۔
وزیر مملکت بلال اظہر کیانی نے کہا کہ شہدا اور ان کے لواحقین کا جذبہ عزم و ہمت اور قربانی کی مثال ہے ،انہوں نے کہا کہ شہید کیپٹن حسنین اختر کے والد بھی پاک فوج میں دفاع وطن کی خدمات انجام دے چکے ہیں۔
