اسلام آباد اپریل 14 (اے پی پی ): وفاقی وزیرداخلہ محسن نقوی سے برطانوی رکن پارلیمنٹ محمد افضل خان کی ملاقات ہوئی۔
ملاقات میں پاک برطانیہ تعلقات کے فروغ اور برطانیہ میں پاکستانی کمیونٹی کے مسائل کے حل پر تبادلہ خیال کیا گیا۔
دہشتگردی سے نمٹنے کیلئے برطانیہ کے تعاون کے حوالے سے گفتگو کے ساتھ ساتگ دہشت گردی کی حالیہ لہر اور سدباب کیلئے کئے گئے اقدامات کے بارے میں تبادلہ خیال کیا گیا ۔ وفاقی وزیرداخلہ محسن نقوی نے پاک برطانیہ تعلقات کو مضبوط کرنے کے لئے موثر کردار پر برطانوی رکن پارلیمنٹ افضل خان کی کاوشوں کو سراہا۔وزیرداخلہ محسن نقوی نے لیبر پارٹی کے سرکردہ رکن و ممبر پارلیمنٹ افضل خان کو برطانیہ میں الیکشن جیتنے پر مبارکباد دی۔
وفاقی وزیر داخلہ محسن نقوی نے کہا کہ امید ہے کہ لیبر پارٹی کے دور میں پاک برطانیہ تعلقات نئی بلندیوں کو چھوئیں گےاور
دہشتگردی کے چیلنج کا کئی ممالک کو سامنا ہے۔وزیر داخلہ کا کہنا تھا کہ وقت آگیا ہے کہ دہشتگردی کے خلاف کثیر الجہتی بین الاقوامی حکمت عملی تیار کی جائے اور بلا تاخیر عمل کیا جائے،انسداد دہشتگردی کیلئے پاکستانی اداروں کی استعداد کار بڑھانے اور ٹریننگ کے لئے برطانوی تعاون کا خیر مقدم کریں گے۔
وزیر داخلہ کا کہنا تھا کہ رطانیہ میں پاکستانیوں کی بہت بڑی تعداد آباد ہے ۔جو کہ پاکستانی کمیونٹی پاکستان کے ساتھ برطانوی معیشت کی مضبوطی کیلئے کلیدی کردار ادا کر رہی ہے۔برطانوی رکن پارلیمنٹ افضل خان کا کہنا تھا کہ دہشتگردی کے خلاف پاکستان کی قربانیوں کو قدر کی نگاہ سے دیکھتے ہیں۔
ان کا کہنا تھا کہ پاک برطانیہ تعلقات کی مزید بہتری کیلئے اپنا کردار ادا کرتا رہوں گا۔
