واشنگٹن ڈی سی، 25 اپریل(اے پی پی):وفاقی وزیرِ خزانہ و محصولات سینیٹر محمد اورنگزیب نے آئی ایم ایف ـ ورلڈ بینک اسپرنگ میٹنگز کے موقع پر سٹی بینک کے وفد سے ملاقات کی، جس کی قیادت جارجی یوردانوف، ہیڈ آف مڈل ایسٹ، پاکستان اینڈ افریقہ (MEPA) نے کی۔
وزیرِ خزانہ نے پاکستان کے مالیاتی شعبے میں سٹی بینک کی طویل مدتی وابستگی اور مسلسل معاونت کو سراہا۔ انہوں نے وفد کو پاکستان کی بہتر ہوتی معاشی صورتحال اور بین الاقوامی کریڈٹ ریٹنگ ایجنسیوں کی جانب سے ریٹنگ میں حالیہ بہتری سے آگاہ کیا، جس سے پاکستان کے کمرشل کریڈٹ مارکیٹس میں واپسی کی راہ ہموار ہوئی ہے۔
دونوں فریقین نے مستقبل میں تعاون کے امکانات کا جائزہ لیا اور باہمی شراکت داری کو مزید مستحکم کرنے کے عزم کا اظہار کیا۔
