اسلام آباد23اپریل(اے پی پی):وفاقی وزیر برائے امور کشمیر، گلگت بلتستان و سیفران، انجینئر امیر مقام سے گلگت بلتستان کے وزیر اعلیٰ حاجی گلبر خان نے صوبائی وزراء کے ہمراہ وزارت میں ملاقات کی۔
ملاقات کے دوران دیامر بھاشا ڈیم کے متاثرہ افراد کے مسائل پر تبادلہ خیال کیا گیا۔وفاقی وزیر نے ڈیم متاثرین کے حقوق کے لیے اپنی حمایت کے عزم کا اعادہ کیا۔ انہوں نے کہا کہ وہ ہمیشہ جی بی کے عوام کے ساتھ کھڑے رہے ہیں اور ان کی ترقی کو حکومت کی اولین ترجیحات میں شمار کرتے ہیں۔
انہوں نے کہا کہ وزیر اعظم محمد شہباز شریف جی بی کی ترقی اور خوشحالی میں گہری دلچسپی رکھتے ہیں۔
گلگت بلتستان کے وزراء نے انجینئر امیر مقام پر اعتماد کا اظہار کرتے ہوئے کہا، ہم آپ کو جی بی کے عوام کا وفاقی سطح پر حقیقی نمائندہ سمجھتے ہیں۔وزیر اعلیٰ حاجی گلبر خان نے جی بی کے عوام کے مسائل کے حل کے لیے مسلسل کوششوں اور خلوص نیت پر وفاقی وزیر کا شکریہ ادا کیا۔
