راولپنڈی، 22 اپریل (اے پی پی):وفاقی وزیر برائے ریلوے، حنیف عباسی نے راولپنڈی انسٹیٹیوٹ آف کارڈیالوجی (آر آئی سی) کے نئے او پی ڈی بلاک کا افتتاح کیا۔ آر آئی سی 13 سال پہلے قائم کیا گیا تھا، اور یہاں سے ہزاروں افراد صحت کی سہولتیں حاصل کر چکے ہیں۔
اس موقع پر میڈیا سے گفتگو کرتے ہوئے وفاقی وزیر نے کہا کہ یہ پروجیکٹ وزیر اعظم پاکستان کی قیادت میں 40 کروڑ روپے کی لاگت سے مکمل ہو رہا ہے اور وزیر اعظم کی دن رات کی محنت نے اس کی تکمیل میں اہم کردار ادا کیا ہے۔
وفاقی وزیر نے مزید کہا کہ وزیر اعظم پاکستان نے ملک کی عوام کی خدمت میں کوئی کسر نہیں چھوڑی اور اس بلاک کی تکمیل کا مقصد عوام کو بہترین صحت کی سہولتیں فراہم کرنا ہے۔
انہوں نے کہا کہ وزیر اعظم نے بلوچستان کو پٹرولیم مصنوعات کی قیمتوں کا فائدہ دینے کا فیصلہ کیا ہے۔ بلوچستان کی خونی سڑک کو از سر نو تعمیر کیا جائے گا، جس سے نہ صرف بلوچستان بلکہ پورے پاکستان کو فائدہ ہوگا۔
وفاقی وزیر نے کہا کہ ہم نے راولپنڈی میں اینٹی انکروچمنٹ مہم کا آغاز کیا ہے، جو چیف منسٹر پنجاب مریم نواز سے متاثر ہو کر شروع کی گئی ہے۔ سندھ اور بلوچستان میں بھی کئی اہم اقدامات کئے گئے ہیں جن کی ہم قدر کرتے ہیں
انہوں نے مزید کہا کہ اس سال راولپنڈی انسٹیٹیوٹ آف یورولوجی میں کڈنی اور لیور ٹرانسپلانٹ شروع ہونے جا رہے ہیں، جو عوام کے لیے ایک خوشخبری ہے۔
