اسلام آباد، 24اپریل(اے پی پی): بلوچستان کے وزیر زراعت و کوآپریٹو میر علی حسن زہری نے وفاقی وزیر تجارت جام کمال خان سے اسلام آباد میں ملاقات کی۔ یہ ملاقات خیرسگالی کے جذبے کے تحت ہوئی، جس میں باہمی دلچسپی کے امور، بالخصوص زراعت اور تجارتی شعبوں میں تعاون پر تبادلہ خیال کیا گیا۔
ملاقات کے دوران دونوں رہنماؤں نے بلوچستان میں زرعی ترقی، مارکیٹ تک رسائی اور زرعی اجناس کی بین الصوبائی و بین الاقوامی تجارت کو فروغ دینے کے لیے ممکنہ اقدامات پر گفتگو کی۔ وزیر زراعت میر علی حسن زہری نے صوبے کی زراعت میں موجود صلاحیتوں اور مسائل سے آگاہ کیا، جبکہ وفاقی وزیر جام کمال خان نے وفاقی حکومت کی جانب سے مکمل تعاون کی یقین دہانی کرائی۔
انہوں نے کہا کہ بلوچستان کی زرعی پیداوار کو ملکی و غیر ملکی منڈیوں تک رسائی دینے کے لیے مربوط حکمت عملی اپنائی جائے گی تاکہ مقامی کسانوں کو زیادہ سے زیادہ فائدہ پہنچایا جا سکے۔
دونوں وزراء نے وفاق اور صوبے کے اداروں کے درمیان رابطہ مضبوط بنانے اور مشترکہ منصوبوں پر کام کرنے کی ضرورت پر بھی زور دیا۔
