اسلام آباد،22 اپریل(اے پی پی ): وفاقی وزیر تجارت جام کمال خان سے پاکستان میں کرغزستان کے سفیر آوازبیک اٹاخانوف نے منگل کے روز ان کے دفتر میں ملاقات کی۔ ملاقات میں دو طرفہ تجارت، اقتصادی تعاون اور علاقائی روابط کو فروغ دینے پر تبادلہ خیال کیا گیا۔
اس موقع پر وزیراعظم کے کوآرڈینیٹر رانا احسان افضل اور وزارت تجارت کے سینئر حکام بھی موجود تھے۔
وفاقی وزیر نے کرغز سفیر کا خیرمقدم کیا اور پاکستان و کرغزستان کے درمیان تاریخی و ثقافتی تعلقات کی اہمیت کو اجاگر کرتے ہوئے کہا کہ پاکستان ان برادرانہ تعلقات کو ایک جامع اقتصادی شراکت داری میں تبدیل کرنا چاہتا ہے تاکہ دونوں ممالک کو باہمی فائدہ پہنچے۔
ملاقات کے دوران دونوں فریقین نے خاص طور پر تجارت، سرمایہ کاری اور علاقائی روابط کے شعبوں میں تعاون کو مزید بڑھانے کے عزم کا اعادہ کیا۔
