لاہور۔1اپریل (اے پی پی):وفاقی وزیر داخلہ محسن نقوی نے عید کے موقع پر شہدائے وطن کو خراجِ عقیدت پیش کرتے ہوئے ریلوے آفیسرز کالونی والٹن میں شہید کیپٹن محمد علی قریشی کی رہائش گاہ کا دورہ کیا۔
اس موقع پر انہوں نے شہید کے اہل خانہ سے ملاقات کی اور ان کے حوصلے کو سراہا۔وزیر داخلہ نے شہید کیپٹن محمد علی قریشی کی والدہ، اہلیہ، معصوم بیٹی آیانا اور دیگر اہل خانہ سے ملاقات کی اور انہیں دلاسہ دیا۔
انہوں نے شہید کیپٹن کی عظیم قربانی کو شاندار الفاظ میں خراجِ تحسین پیش کیا۔اس موقع پر شہید کیپٹن کی والدہ اپنے بیٹے کو یاد کرتے ہوئے آبدیدہ ہو گئیں اور کہا کہ “ہماری سوچ علی سے شروع ہوتی تھی اور علی پر ہی ختم ہوتی تھی۔اس موقع پر معصوم بیٹی آیانا نے والد کی تصویر کو چوم کر اپنی محبت کا اظہار کیا اور ان کا میڈل گلے میں ڈال لیا۔
وزیر داخلہ محسن نقوی نے شہید کے اہل خانہ کے ساتھ وقت گزارا اور شہید کی جرات و بہادری کو سراہتے ہوئے ان کے درجات کی بلندی کے لیے دعا کی۔ انہوں نے کہا کہ قوم شہید کیپٹن محمد علی قریشی کی لازوال قربانی کو ہمیشہ یاد رکھے گی۔
محسن نقوی نے اس عزم کا اظہار کیا کہ شہید کیپٹن محمد علی قریشی کی قربانی پاک فوج اور پوری قوم کے دہشت گردی کے خلاف ناقابلِ شکست عزم کی علامت ہے۔
انہوں نے کہا کہ “شہید کیپٹن علی قوم کے ہیرو ہیں اور ان کے خاندان کا ہر طرح خیال رکھا جائے گا۔”واضح رہے کہ شہید کیپٹن محمد علی قریشی 26 اگست 2024 کو بلوچستان میں دہشت گردوں کے خلاف بہادری سے لڑتے ہوئے جامِ شہادت نوش کر گئے تھے۔
وزیر داخلہ نے شہید کی قربانی کو سراہتے ہوئے کہا کہ انہوں نے بہادری سے مقابلہ کر کے دہشت گردوں کے مذموم عزائم کو ناکام بنایا۔
صائمہ ، حبیب شاہ
