اسلام آباد، 18اپریل (اے پی پی ): وفاقی وزیر داخلہ و نارکوٹکس کنٹرول محسن نقوی سے پاک ۔گلف تعاون کونسل اینٹی نارکوٹکس کانفرنس کے وفود کے سربراہان کی ملاقات ہوئی۔
وزیر داخلہ محسن نقوی نے پاک ۔ جی سی سی کانفرنس میں شرکت پر متحدہ عرب امارات۔ سعودی عرب۔ قطر۔ کویت۔ بحرین اور عمان کے وفود کا شکریہ اداکیا۔ڈائریکٹر جنرل اینٹی نارکوٹکس فورس میجر جنرل عبدالمعید نے پاک۔ جی سی سی کانفرنس کی سفارشات سے متعلق آگاہ کیا ۔
وفاقی وزیر داخلہ و نارکوٹکس کنٹرول محسن نقوی نے کامیاب کانفرنس پر اے این ایف پاکستان اور گلف تعاون کونسل کے مندوبین کو مبارکباد دی اور بھر پور تعاون کو سراہتے ہوئے کہا کہ جی سی سی کے تمام ممالک ہمارے لیے نہایت قابلِ احترام ہیں ،تمام مندوبین نے انسداد منشیات کے سلسے میں حکومت پاکستان سے مکمل تعاون کا اعادہ کیا۔
ملاقات میں انسدادِ منشیات کیلئے رواں سال کے آخر تک پاک-جی سی سی ممالک کے نارکوٹکس کے وزراء کا اجلاس منعقد کرنے
کا فیصلہ کیا گیا۔ وزیر داخلہ محسن نقوی کا کہنا تھا کہ رواں سال کے آخر تک منشیات کے سدباب کیلئے جی سی سی وزراء کے ساتھ ایک ہی فورم پر بڑے فیصلے لئے جائیں گے۔
انسداد منشیات کے حوالے سے سفارشات کے نتیجے میں باہمی تعاون مزید مضبوط ہو اور باہمی تجاویز کی روشنی میں مؤثر حکمتِ عملی بنانے میں مدد ملے گی۔ وزیر داخلہ کا کہنا تھا کہ ہم مل کر معاشرے سے منشیات کے ناسور کا خاتمہ کرسکتے ہیں۔
ہم نے اینٹی نارکوٹکس کے ادارے کو مزید مؤثر اور مضبوط بنایا ہے،ہم نے ماضی میں بھی مشترکہ آپریشن کئے ہیں اور آئندہ بھی تعاون جاری رکھیں گے،وزیر مملکت طلال چوہدری کا کہنا تھا کہ منشیات کے سدباب کیلئے ٹیکنالوجی کا استعمال وقت کی اہم ضرورت ہے،
تمام مندوبین نے پاکستان کی جانب سے انسداد منشیات کے ضمن میں لئے اقدامات کو سراہا۔ کانفرنس مندوبین کا کہنا تھا کہ کانفرنسنے انسداد منشیات کے حوالے باہمی تعاون کو بڑھانے کا موثر موقع فراہم کیا۔
وفد میں متحدہ عرب امارات کے ڈی جی اینٹی نارکوٹکس ڈیپارٹمنٹ بریگیڈئر سعید عبداللہ السعویدی، قطر کے ڈی جی نارکوٹکس ڈیپارٹمنٹ کرنل رشید ساری، سعودی عرب کے ڈی جی نارکوٹکس ڈیپارٹمنٹ میجر جنرل سعد بن سعود الاجمی، عمان پولیس کے ڈی جی نارکوٹکس بریگیڈئر محمد صالح علی راشد،بحرین کے ڈائریکٹر اینٹی نارکوٹکس ڈیپارٹمنٹ لیفٹیننٹ کرنل محمد خالد، کویت کے ڈائریکٹر آپریشنز کرنل نصیر بدر اور جی سی سی، سی آئی سی سی ڈی کے ڈائریکٹر بریگیڈئر عیسیٰ سعید شامل تھے
وزیر مملکت داخلہ طلال چوہدری، سیکرٹری داخلہ محمد خرم آغا اور ڈائریکٹر جنرل اینٹی نارکوٹکس فورس میجر جنرل عبدالمعید بھی اس موقع پر موجود تھے۔
