اسلام آباد، 29اپریل (اے پی پی):وفاقی وزیر بین الصوبائی رابطہ رانا ثناء اللہ نے قازقستان کے نائب وزیر سیاحت و کھیل یرزان یرکینبایوف اور قازقستان چیمبر آف انٹرنیشنل کامرس (سی سی آئی ) کے صدر کانات آلِن سے ملاقات کی ہے۔ملاقات میں پاکستان اور قازقستان کے درمیان کھیلوں اور سیاحت کے شعبوں میں تعاون کو فروغ دینے پر تبادلہ خیال کیا گیا۔ رانا ثناء اللہ نے دونوں ممالک کے درمیان دوستانہ تعلقات کو سراہا اور انہیں مختلف شعبوں میں عملی تعاون کے ذریعے مزید مضبوط بنانے کی ضرورت پر زور دیا۔
رانا ثناء اللہ نے کہا کہ پاکستان قازقستان کو ہاکی،اسکواش اور سنوکر جیسے کھیلوں میں تکنیکی معاونت فراہم کرے گا،تاکہ ان کھیلوں کو فروغ دیا جا سکے۔ انہوں نے خواتین کی کھیلوں میں شرکت کے فروغ کے لیے خصوصی اقدامات پر بھی بات کی اور کہا کہ اس حوالے سے مشترکہ حکمت عملی ترتیب دی جا سکتی ہے۔ وفاقی وزیر نے نوجوانوں کو مثبت سرگرمیوں کی طرف راغب کرنے کے لیے کھیلوں کے تبادلہ پروگرامز کو انتہائی مؤثر قرار دیا۔
ملاقات کے دوران دونوں ممالک کے اسپورٹس اداروں کے درمیان شراکت داری اور تعاون بڑھانے، کوچز اور ماہرین کے تبادلے، تربیتی پروگرامز اور باہمی مقابلوں کے انعقاد پر اتفاق کیا گیا۔ رانا ثناء اللہ نے اس عزم کا اظہار کیا کہ پاکستان کھیلوں کے فروغ کے لیے قازقستان کے ساتھ قریبی تعاون جاری رکھے گا، تاکہ نہ صرف دوطرفہ تعلقات مضبوط ہوں بلکہ نوجوان نسل کی صلاحیتوں کوبھی اجاگر کیا جا سکے۔
