لاہور،03مئی (اے پی پی):صوبائی وزیر صنعت و تجارت چوہدری شافع حسین سے جاپان کے نیپون گروپ کے سی ای او میچیٹیک یاماموٹو نے ملاقات کی اور پنجاب میں سرمایہ کاری کے مواقع پر بات چیت کی۔ ملاقات میں جاپان کے نیپون گروپ نے پنجاب میں پہلے مرحلے میں لیتھیئم بیٹریوں کا اسمبلنگ پلانٹ اور دوسرے مرحلے میں مینوفیکچرنگ پلانٹ لگانے کا اعلان کیا۔ سی ای او نیپون گروپ نے کہا کہ ہمارے گروپ کو لیتھیئم بیٹریوں کے اسمبلنگ اور مینوفیکچرنگ پلانٹ لگانے کے لئے 2ایکڑ اراضی درکار ہے ۔ ہم یہاں لیتھیئم بیٹریاں تیار کرکے مقامی مارکیٹ کو فراہم کرنے کے ساتھ دیگر ممالک کو برآمد بھی کریں گے۔
صوبائی وزیر صنعت و تجارت چوہدری شافع حسین نے جاپان کے نیپون گروپ کو پنجاب میں سرمایہ کاری پر ہرممکن تعاون کی یقین دہانی کروائی اور کہا کہ پنجاب کے مختلف شعبوں میں سرمایہ کاری کا بہترین وقت اور سازگار ماحول موجود ہے۔ انھوں نے کہا کہ جاپان کا نیپون گروپ لیتھیئم بیٹریاں بنانے کا کارخانہ لگائے ،ہرممکن سہولت دیں گے۔ صوبائی وزیر نے کہا کہ پنجاب کے الیکٹرک وہیکلز سیکٹر میں سرمایہ کاری کی وسیع گنجائش موجود ہے۔ جاپان کا نیپون گروپ ای وی سیکٹر میں بھی سرمایہ کاری کرسکتا ہے ۔ انھوں نے کہا کہ جاپان کے سرمایہ کار پنجاب میں ای وی چارجنگ کا اسمبلنگ پلانٹ لگانے کا بھی جائزہ لیں کیونکہ الیکٹرک وہیکلز سیکٹر کا فروغ پنجاب حکومت کی پہلی ترجیح ہے۔ صوبائی وزیر نے کہا کہ جاپان کا نیپون گروپ پنجاب میں اے آئی سافٹ ویئر ہاؤس بنانے کا بھی جائزہ لے۔ پنجاب کے سپیشل اکنامک زونز میں غیر ملکی سرمایہ کاروں کو خصوصی مراعات حاصل ہیں۔ یہاں سرمایہ کاری پر 10سال تک انکم ٹیکس کی چھوٹ اور ایک مرتبہ ڈیوٹی فری مشینری درآمد کی سہولت موجود ہے ۔ انھوں نے کہا کہ ملکی اور غیر ملکی سرمایہ کار پنجاب کو سرمایہ کاری کیلئے ترجیح دے رہے ہیں۔ چوہدری شافع حسین نے کہا کہ جاپان کے سرمایہ کار پنجاب میں کھلے دل سے سرمایہ کاری کریں ،حکومت مکمل سپورٹ فراہم کرے گی۔
ڈی جی پنجاب سرمایہ کاری بورڈ ڈاکٹر سہیل احمد ،سی ای او پیڈمک اور دیگر بھی ملاقات میں موجود تھے ۔
