لاہور، 2 مئی ( اے پی پی): وفاقی وزیر ریلوے محمد حنیف عباسی نے لاہور ریلوے اسٹیشن کا اچانک دورہ کیا اور صفائی ستھرائی کے ناقص انتظامات پر برہمی کا اظہار کرتے ہوئے ڈویژنل میڈیکل افسر صائمہ ممتاز کو معطل کر دیا۔
اسٹیشن پر ملازمین کی غیر حاضری کا نوٹس لیتے ہوئے اسٹیشن ماسٹر لاہور کی سرزنش کی۔ دورہ کے دوران وفاقی وزیر نےصوبائی فوڈ اتھارٹیوں کو چھاپہ مارنے کی اجازت دینے کا فیصلہ کیا۔ جس کے بعد فوڈ اتھارٹیاں ریلوے اسٹیشنوں پر بغیر اجازت کھانے کا معیار چیک کر سکیں گی۔
وفاقی وزیر اسٹیشن سے پیدل واشنگ لائن پہنچ گئے اور ملازمین کی کم تعداد کا نوٹس لیا۔
انہوں نے کہا کہ من پسند بھرتیوں کی وجہ سے آج اس حالت کو پہنچے ہیں، نرم مزاجی دکھا لی، اب سختی کی جائے گی: محمد حنیف نے بد عنوانی کے کیسز ایف آئی اے کو دینے کا فیصلہ کیا۔
